erdoghanning meshel yéqishi bilen filyos tebiiy gazini quruqluqqa yetküzüsh xizmiti bashlandi

türkiye awazi radiyosi xewiri: jumhur reis erdoghan filyos türkiye néfit portidiki qaradéngiz tebiiy gazini xizmetke kirishtürüsh murasimida qilghan sözide, murasimgha qatnashqanlargha salam qildi we türkiye xelqining roza héytini tebriklep mundaq dédi: ««bizning ikkinchi bayrimimiz élimizning énérgiye musteqilliqi üchün tarixiy bir qedem hésablinidighan qaradéngiz tebiiy gazining ishqa kirishtürülüshidur. bu layihening tunji qedimi 2020-yili 8-ayda filyos bilen bolghan ariliqi 175 kilométir kélidighan sakarya tebiiy gaz sahesisde <fatih> burghilash paraxotining burghilap tekshürüsh paaliyiti bilen tashlanghanidi.»

erdoghan «fatih» burghilash paraxotigha «qanuni» we «yawuz» burghilash paraxotliriningmu qoshulushi bilen kéngeygen burghilap tekshürüsh netijiside, qaradéngizdiki tebiiy gaz zapisining 710 milyard kub métirgha yetkenlikini qeyt qildi.

jumhur reis erdoghan dunyaning bashqa jaylirida tebiiy gaz burghilap tekshürüsh üchün  6-7 yil waqit serp qilinidighanliqini, özlirining bu waqtini qisqartip, 3 yilning astigha chüshürgenliklirini tekitlep mundaq dédi: «burghilap tekshürüsh xizmiti bashlinip peqet 32 ay ötkendin kéyinla, qaradéngizning tebiiy gazini ishqa kirishtürüsh murasimi arqiliq bu uzun we japaliq seperning eng xushallinarliq peytige yétip kelduq. sakarya sahesidin künige 10 milyon kub métir gaz chiqirimiz. xudayim buyrusa,  aldimizdiki basquchta yéngi tebiiy gaz quduqlirining qoshulushi bilen künige 40 milyon kub métir tebiiy gaz chiqirimiz.»

erdoghan bu layihe arqiliq türkiyening tebiiy gaz mesiliside chet elge béqindi bolup qélishni körünerlik töwenlitipla qalmay, filyos we zongguldak rayonining muhim énérgiye, téxnologiye we eshya oboroti bazisigha aylandurulghanliqini qeyt qildi.

erdoghan sözini mundaq dawamlashturdi: «tebiiy gaz chiqirish sewiyesini toluq iqtidargha yetküzginimizde, élimizning yilliq éhtiyajining texminen% 30 ini bu bazidin qanduralaymiz.»