түркийә данийәгә қаттиқ наразилиқ билдүрди

түркийә авази радийоси хәвири: түркийә ташқи ишлар министирлиқи тәрипидин бу һәқтә елан қилинған байанатта, мундақ дейилди: «данийәдә түнүгүнму йәнә бир қетим муқәддәс китабимиз қуран кәрим вә шанлиқ байриқимизға қилинған пәскәшләрчә һуҗумни қаттиқ әйибләймиз. агаһландурушлиримизға қаримай, бундақ пәскәшләрчә һуҗумларға пикир әркинлики намидин рухсәт қилинишини қобул қилғили болмайду.»

байанатта, түркийәниң бу мәсилигә қарита позитсийәсиниң данийәниң әнқәрәдә турушлуқ баш әлчисигә йәткүзүлгәнлики әскәртилип мундақ дейилди: «йавропада йеқиндин буйан кишини әндишигә салидиған дәриҗидә барғансери әвҗ елип кетиватқан ислам дүшмәнлики вә чәт әлликләргә өчмәнлик қилишниң әң рошән намайәндиси болған бу пәскәшләрчә һуҗумлар  вә буниңға охшиған өчмәнлик җинайәтлиригә қарши бизниң көп тәрәплик мунбәрләр вә икки тәрәплик саһәләрдики тәшәббуслиримиз шәк-шүбһисиз һалда изчил давамлишиду.»

«данийәниң бу мәсилигә сәзгүр позитсийә тутмаслиқи дунйаниң һәрқайси җайлиридики барлиқ мусулманларниң қаттиқ наразилиқини қозғимақта. җүмлидин данийә милйардлиған кишиләрниң наразилиқини нәзәргә алмайватиду.»

«рамизан ейида давамлишиватқан бу хил қутратқулуқларниң алди елиниши вә тәкрарланмаслиқи үчүн, данийәдин күчлүк тәдбирләрни қоллинишини йәнә бир қетим тәләп қилимиз.»

дөлитимиз (түркийә җумһурийити) дөләт мудапиә министири хулуси ақарму данийәдики қуран кәрим вә түркийә байриқиниң давамлиқ һуҗум қилинишини қаттиқ әйибләп мундақ деди: «буни кишилик һоқуқ , пикир әркинлики , мәдәнийәт вә заманивилиқ уқумлири билән чүшәндүргили болмайду. биз алақидар һөкүмәтләр вә министирлиқлардин бу һәқтә дәрһал күчлүк тәдбирләрни қоллинишини күтмәктимиз.»

данийәдә түркийәниң копенһагенда турушлуқ әлчиханисиниң алдида түркийә байриқи вә қуран кәримгә һуҗум қилинғаниди.

данийәдики ислам дүшмәнлики вә әсәбий милләтчи пайриотерне гар лив дәп атилидиған радикал бир гуруппа әзалириниң бу қутратқулуқи « Danske Patrioter Facebook » сәһиписидә нәқ мәйдандин тарқитилғаниди.

бу гуруппиниң бир түркүм әзалири исламға һақарәт қилип шоарларни товлиған вә түркийә байриқиға пәскәшләрчә һуҗум қилғаниди.

данийәдә 24- вә 31-март күнлириму түркийәниң копенһаген әлчиханисиниң алдида қуран кәрим вә түркийә байриқиға һуҗум қилинғаниди.