چاۋۇشئوغلۇ: پەلەستىن دەۋاسىنى ھەر دائىم قوللايمىز

تۈركىيە ئاۋازى رادىيوسى خەۋىرى: مىنىستىر چاۋۇشئوغلۇ پايتەخت ئەنقەرەنىڭ كەچىئۆرەن ناھىيەسىدە ئۆتكۈزۈلگەن ئىپتار پىروگراممىسىدا كەڭ خەلق ئاممىسى ۋە ياشلار بىلەن بىر يەرگە جەم بولدى.

چاۋۇشئوغلۇ بۇ يەردە قىلغان سۆزىدە، ئىسرائىلىيە ئارمىيەسىنىڭ مەسجىدى ئەقساغا قىلغان ھۇجۇمى توغرىلىقمۇ توختىلىپ مۇنداق دېدى: ««رامىزان ئېيىدا ئىسرائىلىيەلىكلەر مەسجىدى ئەقساغا بېسىپ كىردى، ھەرەم شەرىفنىڭ مۇقەددەسلىكىگە دەخلى-تەرۇز قىلدى، ئەلۋەتتە بىز بۇنداق قىلمىشلار ئالدىدا سۈكۈت قىلمىدۇق. ھەم پەلەستىن ھەم ئىسرائىلىيە دائىرىلىرى بىلەن تېلېفوندا سۆھبەتلىشىپ، ئۇلاردىن ھۇجۇملارغا ئۈزۈل – كېسىل خاتىمە بېرىلىشىنى تەلەپ قىلدۇق. بىز بۇ جەرياندا ئىسلام ھەمكارلىق تەشكىلاتىنى جىددىي يىغىن چاقىرىپ، مۇھىم قارارلارنىڭ چىقىرىلىشىنى ئەمەلگە ئاشۇردۇق. قىسقىسى، بىز پەلەستىن دەۋاسى، مەسجىدى ئەقسا ۋە قۇددۇسنى ھەر دائىم قوللاپ كەلدۇق. بۇ سەزگۈرلۈكىمىز ھېچقاچان ئۆزگەرمەيدۇ.»

دۇنيانىڭ ھەرقايسى جايلىرىدا كىرىزىس ۋە توقۇنۇشلارنىڭ بارلىقىنى بايان قىلغان چاۋۇشئوغلۇ، تۈركىيەنىڭ ئافرىقا، ئاسىيا ۋە لاتىن ئامېرىكا ئەللىرىگە قاراتقان ئىشىكنى ئېچىۋېتىش سىياسەتلىرى ئارقىلىق دۇنيانىڭ ھەرقايسى جايلىرىدا بايرىقىنى لەپىلدىتىۋاتقان، قۇدرىتىنى نامايان قىلىۋاتقان، دۇنيانىڭ ھەرقايسى جايلىرى بىلەن بولغان مۇناسىۋەتلىرىنى تەرەققىي قىلدۇرۇۋاتقان بىر دۆلەت ئىكەنلىكىنى تەكىتلىدى.