erdoghan: bu qiyin ötkeldin xelqimiz bilen birlikte ötimiz
dölitimiz (türkiye jumhuriyiti) jumhur reisi rejep tayyip erdoghan qahramanmarash merkezlik yer tewresh apiti keltürüp chiqarghan weyranchiliq we qiyin ötkeldin türkiye xelqi bilen birlikte ötidighanliqlirini éytti.
türkiye awazi radiyosi xewiri: jumhur reis erdoghan, qahramanmarash qatarliq türkiyening 10 wilayitide yüz bergen yer tewresh apiti heqqide bergen bayanatida, «hazirghiche qiyin ötkellerdin qandaq ötken bolsaq, buningdin kéyinmu xelqimiz bilen birlikte muweppeqiyetlik halda ötimiz» dédi.
erdoghan, paytext enqerede jiddiy ehwallargha taqabil turush qomandanliq merkizi binasida chaqirilghan ministirlar kéngishi yighini harpisida, türkiye jiddiy ehwallargha taqabil turush qomandanliq merkizidiki xadimlargha xitab qildi.
jumhur reis erdoghan, jiddiy ehwallargha taqabil turush qomandanliq merkizining barliq tarmaqliri bilen birlikte yer tewresh apiti yüz bergendin buyan mislisiz küreshni dawamlashturuwatqanliqini we buningdin kéyinmu shundaq qilidighanliqini qeyt qildi, hemde yer tewresh apitide hayatidin ayrilghanlargha allah taaladin rehmet, yarilanghanlargha shipaliq tilep mundaq dédi:
«nahayiti chong apetke duch kelduq. apettin kéyin ishliniwatqan xizmetlerni közitiwatimiz. nishanimiz bir yil ichide yer tewresh apitide örülüp chüshken binalarning ornigha yéngilirini sélishtur.»
