erdoghan: térrorizmgha qarshi kürishimizni üzlüksiz dawamlashturimiz
jumhur reis rejep tayyip erdoghan: «oqutquchimizgha qolini kötürgenlerning hemme nersisini kumpeykum qiliwétimiz. biz bu küreshni dölitimizge qaritilghan térrorluq tehditi pütünley tügigüche dawamlashturimiz» dédi.
türkiye awazi radiyosi xewiri: jumhur reis erdoghan oqutquchilar bayrimi munasiwiti bilen 81 wilayettin paytext enqerege kelgen oqutquchilar bilen jumhur reislik mehkimisining körgezme zalidiki ziyapette uchrashti.
«qoralliq qisimlirimiz iraqning we süriyening shimalida élip barghan hawadin zerbe bérish heriketliri arqiliq hujumlar pilanlinip ijra qilinidighan térrorluq uwilirini bitchit qilmaqta» dégen erdoghan, sözini dawamlashturup: «qeyerde bir térrorchi bolsa, bu döletning bixeterlik teshkilati, saqchiliri, herbiy we bixeterlik qisimliri u yerde bolidu. biz buni bügün démeywatimiz, biz gabardimu, judidimu, tendürektimu bolimiz, qisqisi, ular qeyerde bolsa, shu yerde bolimiz» dégenlerni qeyt qildi.
jumhur reis erdoghan yene: «oqutquchimizgha qolini kötürgenlerning hemme nersisini kumpeykum qiliwétimiz. bu ish buningdin kéyinmu mushundaq bolidu. biz bu küreshni dölitimizge qaritilghan térrorluq tehditi pütünley tügigüche üzlüksiz dawamlashturimiz. bizning ewladlirimizni 780 ming kwadrat kilométirining bir ghérichmu yéride térror bolmighan, térrorluq tehditi bolmighan bir türkiyede yashitish iradimiz qetiy» dégenlerni sözlirige ilawe qildi.
