erdoghan 20 dölet guruhi bashliqlar yighinidin kéyin muxbirlarni kütüwélish yighini ötküzdi
jumhur reis rejep tayyip erdoghan, «daéshqa qarshi küreshni bahane qilip, térrorluq teshkilatini qollighanlarmu tökülgen her bir tamche qangha shériktur» dédi.
türkiye awazi radiyosi xewiri: jumhur reis erdoghan hindonéziyede ötküzülgen 20 dölet guruhi bashliqlar yighinidin kéyin, yighin zalining axbarat merkizide muxbirlarni kütüwélish yighini ötküzdi.
jumhur reis erdoghan sözining istanbuldiki térrorluq hujumigha munasiwetlik qismida, daéshqa qarshi küreshni bahane qilip, térrorluq teshkilatini qollighanlarningmu tökülgen her bir tamche qangha shérik ikenlikige isharet qilip: «biz barliq dost we ittipaqdashlirimizning türkiyening heqliq kürishini semimiy qollishini ümid qilimiz» dédi.
türkiyening térrorluq tehditini uwisida ujuqturush istratégiyesini qetiylik bilen ijra qilishni dawamlashturidighanliqini bildürgen erdoghan: «néme ishlarni qilishi, kimlerning arqisigha yoshurunushidin qetiynezer, térrorchilar özlirini kütüwatqan achchiq aqiwettin qéchip qutulalmaydu... men shuni yene bir qétim tekitlimekchimenki, dölitimiz we rayonimizning kelgüside térrorluqning héchqandaq türige orun yoq» dégenlerni qeyt qildi.
erdoghan türkiyening amérikadin F-16 sétiwélish mesilisi toghrisida toxtilip: «bu heqte(amérika pirézidénti) jo baydin ependi ijabiy ilgirileshlerning barliqini éytti» dédi.
u shimaliy qibris türk jumhuriyitining türk döletliri teshkilatining közetküchi ezaliqigha qobul qilinishi toghrisida bolsa: «bizning bu qararni chiqirishimiz üchün her qandaq bir dölet, her qandaq bir jayning testiqini élishimizning hajiti yoq. u ish pütti» dédi.
jumhur reis erdoghan polshagha chüshken bashqurulidighan bomba toghrisida toxtilip: «men rusiyening sözige hörmet qilishim kérek. rusiyening <bizning bu ish bilen munasiwitimiz yoq> déyishi biz üchün muhim. baydinning bashqurulidighan bombining rusiyede yasalghan bomba emeslikini éytishi, uning rusiye bilen munasiwiti yoqluqini körsitip béridu. tekshürüsh, éniqlash intayin muhim... biz rusiye bilen ukrainani bir üstelning etrapigha olturghuzushqa tirishiwatqan hazirqidek sharaitta, bu urushning üchinchi bir shérikini tépishning, otturigha chiqirishining hajiti yoq» dédi.
jumhur reis erdoghan ashliq karidori toghrisida mundaq dédi: «söhbitimiz üzlüksiz dawamlashmaqta, men hazirmu uning dawamlishidighanliqigha ishinimen, héchqandaq mesile yoq. biz rusiye pirézidénti wladimir putin ependi bilen körüshüp oghut we ammiyak yötkesh mesilisini muzakire qilimiz. muddetni bir yilgha chiqirish üchün tirishchanliq körsitimiz».
