jumhur reis erdoghan neq meydangha bérip qutquzush xizmetlirini közdin kechürdi
jumhur reis rejep tayyip erdoghan bartinning amasra nahiyesidiki kanda tünügün yüz bergen partlashta qaza qilghanlar sanining 41 ke yetkenlikini bildürdi.
türkiye awazi radiyosi xewiri: jumhur reis erdoghan neq meydangha bérip, kanni we partlash yüz bergen jaydiki xizmetlerni közdin kechürdi hemde ichki ishlar ministiri süleyman soylu, emgek we ijtimaiy xizmetler ministiri wedat bilgin we énérgiye we tebiiy bayliqlar ministiri fatih dönmez qatarliqlardin izdesh – qutquzush xizmetliri heqqide melumat igilidi. andin tebiiy apet we jiddiy ehwallarni bir terep qilish bashqarmisining köchme apet maslashturush merkizige bérip, u yerde chaqirilghan qutquzush xizmetlirini maslashturush yighingha riyasetchilik qildi.
u yighindin kéyin bayanat bérip, kandiki eng axirqi ishchiningmu chiqirilghanliqini, qazada hayatidin ayrilghanlar sanining 41 ge yetkenlikini bildürdi.
erdoghan, partlashta hayatidin ayrilghan ishichlargha allahtin rehim – shepqet tilidi, ularning aile – tawabiatliri we türkiye xelqige teziye bildürdi, yaridar halette qutquzuwélinghanlar we dawalash xizmetliri dawamlishiwatqan yaridarlarning salametlikining tézrek eslige kélishini tilidi.
partlashtin kéyila döletning barliq idare – organlirini seperwer qilip, qaza yüz bergen jaylardiki xizmetlerni bashlighanliqlirini tilgha alghan erdoghan, partlashning qandaq meydangha kelgenliki, eger birlirining jawabkarliqi bolup qalsa ularning hemmisining tekshürüshler netijiside otturigha chiqidighanliqini éytti.
u, buningdin kéyin kanlarda birmu yétersizlik, nuqsan, orunsiz xewplerni körüshni xalimaydighanliqlirini tekitlidi.
«kan shéhitlirining amanetlirige ige chiqish bu döletning we uning eng yuqiri wekili bolghan bizning burchimizdur» dégen jumhur reis erdoghan, döletning kanchilarning urugh – tughqanlirigha maddiy yardem béridighanliqini éytti.
jumhur reis erdoghanning neq meydanni közdin kechürüsh xizmitige türkiye büyük millet mejilisi (t b b m) bashliqi mustapa shentop, jumhur reis yardemchisi fuat oqtay, sehiye ministiri fahrettin koja, qatnash we ul eslihe ministiri adil qaraismailoghlu, adalet we tereqqiyat partiyesi muawin bashliqi binali yildirim, jumhur reislik mehkimisi uchur – alaqe ishliri idarisi bashliqi fahrettin altun we jumhur reislik mehkimisi bayanatchisi ibrahim qalin qatarliqlar hemrah boldi.
