dunya jamaetchiliki türkiyege teziye bildürdi

türkiye awazi radiyosi xewiri: dunya jamaetchiliki bartinning amasra nahiyesidiki kömür kénida yüz bergen partlashta hayatidin ayrilghanlar üchün teziye bildürmekte.

ezerbeyjan pirézidénti ilham eliyéw, partlashta qaza qilghanlar munasiwiti bilen jumhur reis rejep tayyip erdoghangha teziye bildürdi.

eliyéw télégrammsiida, bartindiki kömür kénida yüz bergen partlashta nurghun kishining hayatidin ayrilghanliqi we yarilanghanliqi toghrisidiki xewerning özini qattiq lerzige salghanliqini bildürüp, özlirining türkiyening azabini ortaqlishidighanliqini qeyt qildi hemde erdoghandin, hayatidin ayrilghanlarning aile-tawabiatliri we tughqanliridin, shundaqla qérindash türkiye xelqidin özi we ezerbeyjan xelqige wakaliten hal soridi.

u yene yaridarlarning salametlikining tézrek eslige kélishini tilidi.

shimaliy qibris türk jumhuriyti jumhur reisi ersin tatarmu twittérdiki adrésida bartinda yüz bergen kan weqesi toghrisida uchur hembehrilep: «bartin amasradiki kanda yüz bergen partlashtin xewer tépip chongqur qayghurdum. hayatidin ayrilghanlargha allahtin rehim – shepqet, yarilanghanlargha téz shipaliqlar tileymen. qutquzush xadimlirining izdesh – qutquzush xizmetlirini eng qisqa waqit ichide ghelibilik tamamlishigha tilekdashmen» dédi.

rusiye prézidénti wiladimir putinmu jumhur reis erdoghangha teziye télégrammisi yollap, partlashta hayatidin ayrilghanlargha teziye bildürdi.

rusiye pirézidéntliq mehkimisi — kirémil yazma bayanat élan qilip, pirézidént putinning  jumhur reis erdoghangha teziye télégrammisi yollap: «bartindiki kanda yüz bergen pajielik hadise üchün bildürgen chongqur teziyelirimizni qobul qilghaysiler. méning wapat bolghan kan ishchilirining aile – tawabiatliri we tughqanlirigha (weqedin) qayghurghanliqimni we ulargha hemdem bolidighanliqimni, shundaqla yarilanghanlarning salametlikining tézrek eslige kélishini tileydighanliqimni yetküzüp qoyghaysiz» dégenlikini bildürdi.

ukraina prézidénti wiladimir zélénskiy tiwittér adrésida türkche teziye uchuri hembehrilep: «men bartinning amasra nahiyeside kan partlash weqesi yüz bergenlikini anglap chongqur qayghurdum. weqede hayatidin ayrilghanlarning aile – tawabiatliri we tughqanlirigha teziye bildürimen, yarilanghanlarning salametlikining tézrek eslige kélishini tileymen» dédi.

pakistan bash ministiri shahbaz sherifmu twittérdiki adrésida bayanat bérip, kan weqeside adem ölüsh hadisisining körülgenlikidin chongqur qayghurghanliqini tekitlep, «dua we oy – xiyalimiz musibetlik aililer we türkiye xelqi bilen birlikte. qapsilip qalghanlarning baldurraq qutuldurulushini tileymen» dédi.

iyordaniye tashqi ishlar ministirliqi yazma bayanat élan qilip, iyordaniyening qérindash türkiye jumhuriyiti we xelqi bilen hemkarliq ichide ikenlikini bildürdi؛ bayanatta, iyordaniyening, partlashta hayatidin ayrilghanlarning aile-tawabiatliridin hal soraydighanliqi we yarilanghanlarning salametlikining tézrek eslige kélishini tileydighanliqi qeyt qilindi.

bulardin bashqa yene, qazaqistan pirézidénti qasim jömert tokayéw, giruziye pirézidénti salomé zurabishwili, bash ministiri irakli garibashwili we tashqi ishlar ministiri ilia darchiashwili, bilarusiye pirézidénti aléksandér lukashénko, yawropa ittipaqi kéngishi bashliqi charléz méshil, yawropa ittipaqi kéngishi bash katipi marija péjsinowich, girétsiye bash ministiri kiryakos michotaks, firansiye tashqi ishlar ministiri katéréna kolonna, gollandiye tashqi ishlar ministiri wopké xoésktra, omman tashqi ishlar ministirliqi hemde türkiyediki chet el elchixaniliri türkiyege we qazada hayatidin ayrilghanlargha teziye bildürdi.