ibrahim kalin amérika dölet xewpsizlik meslihetchisi bilen körüshti

türkiye awazi radiyosi xewiri: türkiye jumhur reislik mehkimisining bayanatchisi ibrahim kalin amérika dölet xewpsizlik meslihetchisi jek sulliwan (JakeSullivan) bilen istanbulda körüshti.körüshüshte, türkiye bilen amérikaning siyasiy we iqtisadiy munasiwetliri, mudapie sanaitidiki hemkarliq saheliri, rusiyening 24-féwral (2022) tajawuzchiliq urushi bashlighan ukrainaning nöwettiki ehwali, shiwétsiye bilen finlandiyening natogha eza bolush musapiliri, ege déngizi we aqdéngiz bilen jenubiy kawkazning nöwettiki ehwali qatarliq rayon mesililiri muzakire qilindi.

ikki dölet otturisida istratégiyelik méxanizmning emelge ashurulushi bilen birlikte, ortaq menpeetler asasida hemkarliq sahelirini ashurush ümidliri tilgha élindi.

türkiyening «F-16» telipige munasiwetlik basquchlarning axirlishishining ikki döletning istratégiyelik menpeetliri üchün xizmet qilidighanliqi eskertildi.

türkiyening natodiki halqiliq roli tekitlengen körüshüshte, ittipaqdashlarning ortaq bixeterlik xewpige we barliq térrorluq tehditlirige qarshi özara masliship we ittipaqliship heriket qilish kérekliki tekitlendi.

ege déngizi we aqdéngiz mesililiride türkiyening hoquq-menpeetini qoghdashta ikkilenmeydighanliqi tekitlinish bilen birge, girétsiyening tajawuzchiliq we qanunsiz heriketlirini qobul qilghili bolmaydighanliqi otturigha qoyuldi.

dunya bixeterliki we muqimliqigha tehdit séliwatqan ukrainadiki urushni axirlashturush üchün xelqara qanun asasida diplomatik tirishchanliqlargha ehmiyet bérishning muhimliqi körsitildi.