erdoghan iyordaniye qatarliq nurghun döletlerning rehberliri bilen körüshti

türkiye awazi radiyosi xewiri: jumhur reis rejep tayyip erdoghan b d t merkizide nutuqini axirlashturghandin kéyin, finlandiye pirézidénti sauli ninisto, qirghizistan pirézidénti sadir japparow we ispaniye bash ministiri pédro sanchéz bilen körüshti.

u b d t merkizide yene, qatar emiri sheyx temim bin hamad alsani, qazaqistan pirézidénti qasim jömert toqayéw, jenubiy koréye pirézidénti yun sukyéul, bangladish bash ministiri sheyx hasina wejid bilen söhbetleshti.

jenubiy koréye pirézidénti yun sukyéul jumhur reis rejep tayyip erdoghanning natodiki rolini we rehberlikini teqdirleydighanliqini éytti.

jumhur reis rejep tayyip erdoghan pirézidént yun sukyéulning jenubiy koréye ziyaret teklipige jawaben, qisqa waqit ichide jenubiy koréyeni ziyaret qilishni pilan qiliwatqanliqini bildürüp: «körüshüshimiz kérek, qilidighan nurghun ishlirimiz bar» dédi.

rejep tayyip erdoghanning qazaqistan pirézidénti qasim jömert toqayéw bilen qilghan söhbitige, b d t bash katipi gutérrésmu qétildi.

rejep tayyip erdoghan b d t merkizidin iyordaniye padishah 2-abdullah we heyetler bilen birlikte türk öyige bardi. bu yerde rejep tayyip erdoghan bilen padishah 2-abdullah ayrim körüshti.

körüshüshtin kéyin, xelqara putbol fédératsiyeliri birleshmisi (FIFA) bashliqi giyanni infantino, isirailiye bash ministiri yair lapid we yaponiye bash weziri kishida fumiyoni ayrim-ayrim qobul qildi.

yaponiye tashqi ishlar wazaritining bayanatigha asaslanghanda, bash wezir kishida fumiyo rusiyening ukrainadiki hujumlirini «xelqaraliq tertipning asasini tewretken zorawanliq heriketliridur» dégen.

kishida fumiyo körüshüshte, hujum astidiki ukrainadin ashliq éksportini dawamashturushta türkiyening oynighan rolini we diplomatik tirishchanliqlirini maxtighan.

ikki rehber iqtisadiy shériklik kélishimini téz sürette netijige ige qilish üchün, muzakirelerni tézleshtürüsh toghrisida pütüshken.

ikki rehberning körüshüshi axbaratqa yépiq shekilde ötküzüldi.

jumhur reis rejep tayyip erdoghan ukraina pirézidénti wolodimir zélénskiy bilen téléfonda körüshti.

ukraina pirézidénti wolodimir zélénskiy twittérda bu heqte bayanat élan qilip: «türkiye jumhur reisi rejep tayyip erdoghan bilen téléfonda körüshtuq. nöwettiki iewpsizlik mesililirini muzakire qilduq» dédi.