erdoghan shangxey hemkarliq teshkilati bashliqlar yighinigha qatnishish üchün özbékistangha baridu

türkiye awazi radiyosi xewiri: jumhur reis erdoghan özbékistan pirézidénti shewket mirziyayéwning teklipige binaen yighingha qatniship, bir qatar döletlerning rehberliri bilen ayrim uchrishishlarni ötküzidu.

jumhur reis erdoghan özbékistanning semerqent shehiridiki köchet tikish paaliyitige qatnishidu, sheherning «ebediy sheher» depmu atilidighan yéngi berpa qilinghan rayonlirini ziyaret qilidu we bir qisim rehberler bilen birlikte kechlik ziyapetke ishtirak qilidu.

erdoghan özbékistan ziyaritining ikkinchi küni bashliqlar yighinining échilishigha qatniship, aile süritige chüshidu we yighinning ikkinchi bölümide söz qilidu.

resmiy chüshlük tamaqqa qatnishidighan erdoghanning, bashliqlar yighini dairiside rusiye pirézidénti wiladimir putin we xitay dölet reisi shi jinping qatarliq bir qatar emeldarlar bilen ayrim uchrishishlarni ötküzüshi pilanlanmaqta.

ashliq karidori mesilisining erdoghan – putin uchrishishining asasliq qaralmisi bolushi kütülmekte.

bashliqlar yighinigha shangxey hemkarliq teshkilatigha eza rusiye, xitay, qazaqistan, qirghizistan, tajikistan, pakistan, hindistan we özbékistanning shundaqla teshkilatning közetküchi ezaliri, bélarusiye, mongghuliye we iran qatarliq döletlerning pirézidéntliri, hemde sahibxan dölet özbékistanning pirézidénti shewket mirziyayéw teklip qilghan türkmenistan pirézidénti serdar berdimuhemmedow we xelqara teshkilatlarning wekilliri qatnishidu.