erdoghan: kirodiye musulmanlargha erkinlik muhiti yaritip bérish jehettin ülgilik döletlerdin biri
dölitimiz (türkiye jumhuriyiti) jumhur reisi rejep tayyip erdoghan kirodiyening musulmanlargha erkinlik, hörmet qilinish we huzur muhiti yaritip bérish jehettin yawropadiki ülgillik döletlerdin biri ikenlikini éytti.
türkiye awazi radiyosi xewiri: jumhur reis erdoghan, dölet ishliri ziyaritide boluwatqan kirodiyening pirézidénti zaaghrébta, kirodiye pirézidénti zoran milanowich bilen ayrim we heyetler ara uchrishishlarni élip barghandin kéyin, birleshme axbarat élan qilish yighini ötküzdi.
u bu yerde qilghan sözide, uchrishishlarda ikki terep munasiwetliri heqqide keng dairilik muzakire élip barghanliqlirini, hemde rayondiki özgirishler we 24 – féwral küni bashlanghan rusiye – ukraina urushi heqqide özara pikir almashturghanliqlirini qeyt qildi.
ukraina portliridin ashliq yötkesh mesilisi toghriliqmu toxtalghan erdoghan, hazirche rusiye teripidin ashliq yötkesh xizmitining bashlanmighanliqini, lékin türkiyening rusiyedinmu ashliq yötkishini bashlishini kütüwatqanliqini eskertti, hemde rusiye pirézidénti wiladimir putinning ashliq yötkesh mesiliside heqliq teripining barliqini tekitlep mundaq dédi: «tolimu epsuski, toshuluwatqan ashliqlar namrat döletlerge emes, eksiche bay döletlerge kétiwatidu. ashliq yötkeshtiki meqset néme? namrat döletlerge dawamliq ashliq toshushtur, buni üzlüksiz dawamlashturushtur. nöwette, bir tereptin, rusiyege émbargolar dawamlishiwatqan bir peytte, bu émbargolargha qarimay bu émbargolarni yürgüzüwatqan döletlerge ashliq toshulushi, pirézidént putinnimu biaram qilmaqta.»
bu mesilining hel qilinishi üchün özbékistanning semerqent shehiride 15 – 16 – séntebir künliri chaqirilidighan shangxey hemkarliq teshkilati bashliqlar yighinida, putin bilen bu heqte muzakire élip baridighanliqlirini éytqan jumhur reis erdoghan, mundaq dep körsetti: «shuni ümid qilimizki, rusiye teripidinmu ashliq yötkesh xizmitini bashlitayli we heqiqiy namrat döletlergimu bu ashliqlarni yetküzeyli.»
jumhur reis rejep tayyip erdoghan, kéyinche sisaqta islam medeniyet merkizining échilish murasimigha qatnashti, hemde bu yerde qilghan sözide, kirodiyening musulmanlargha erkinlik, hörmet qilinish we huzur muhiti yaritip bérish jehettin yawropadiki ülgillik döletlerdin biri ikenlikini tekitlep mundaq dédi: «shek – shübhisizki, bu erkinlik we huzur muhiti peqet musulman qérindashlirimiz üchünla emes, bashqa dinlar we medeniyetler üchünmu küchke ige. bügün biz échilishini ishqa ashurghan sisaq islam medeniyet merkizimu hem kirodiyening bu ülgilik ornining, hemde sisaq shehirining köp medeniyetlik qurulmisining simwolliridin bir süpitide mewjudiyitini dawamlashturidu.»
