girétsiyening qanunsiz qilmishlirigha qarshi türkiyedin diplomatik heriket ...
türkiye girétsiyening qanunsiz qilmishlirigha qarshi diplomatik heriket bashlidi.
türkiye awazi radiyosi xewiri: tashqi ishlar ministiri mewlut chawushoghluning imzasi bilen yawropa ittipaqining 25 paytextige, yawropa ittipaqi tashqi munasiwet we bixeterlik siyasiti aliy wekili josép borrélgha, b d t bixeterlik kéngishining daimiy ezalirigha shundaqla shimaliy atlantik ehdi teshkilati-nato bash katipi jéns stolténbérg we b d t bash katipi antoniyo gutérrésqa türkiyening ege mesililirini hel qilishtiki meydani we köz qarishi chüshendürulgen mektuplar yollandi.
diplomatik menbelerdin igilengen melumatlargha asaslanghanda, 1 - séntebirde (2022) yollanghan mektuplarda girétsiyening qanunsiz heriketliri we chékidin ashqan telepliri terepke hemmining diqqiti tartilghan.
mektupta, ege déngizida bir-birige chétishliq we özara zich munasiwetlik mesililerning barliqi, térritoriyelik déngiz teweliki we dölet hawa teweliki, chong quruqluq tekshiliki we térritoriyelik déngiz tewelikining cheklik halgha keltürülüshi, sherqiy ege déngizi arallirining gheyriy herbiy salahiyitige xilapliq qilinishi, ünümlük xelqaraliq shertnamiler bilen igilik hoquqi grétsiyege bérilmigen arallar, kichik arallar we qiyalar mesilisi hemde «SAR », «FIR» we «NAVTEX» qatarliq mulazimet saheliri mesilisi barliqi tekitlendi.
mektupta, girétsiyening ege déngizidiki térritoriyelik déngiz teweliki kenglikining 6 déngiz mili ikenlikige qarimastin, 10 déngiz mili hawa tewelikige ige ikenlikini dewa qiliwatqanliqi tekitlinip, girétsiyening dunyada bashqa héchqandaq dölet teripidin étirap qilinmighan we uyghun körülmeydighan térritoriyelik déngiz teweliki we hawa boshluqi chégrasigha ige birdinbir dölet ikenliki tekitlendi.
yene bir tereptin, mektupta, türkiyening ege déngizi mesililirini ikki döletning asasliq heq - hoquqi we qanunluq menpeetini özara étirap qilish arqiliq xelqara qanun dairiside hel qilalaydighanliqigha ishinidighanliqi otturigha qoyuldi.
mektupta, türkiyening diyalog we hemkarliqni qollash meydanigha qarimastin, girétsiyening diyalogdin özini qachurup kéliwatqanliqi, jiddiychilikni ashurup, yawropa ittipaqini ege mesililirining bir parchisigha aylanduruwalghanliqi alahide eskertildi.
