t r t bash mudiri yawropa axbarat tarqitish orunlirini térrorizmgha qarshi turushqa chaqirdi

türkiye awazi radiyosi xewiri:t r t ning bash mudiri mehmet zayid sobaji yawropa axbarat tarqitish orunlirini térrorizmgha qarshi turushqa chaqirdi

türkiye awazi radiyosi xewiri: yawropa axbarat tarqitish birleshmisi (EBU) ge eza 41 dölettin kelgen axbarat tarqitish orunlirining 200 dek yuqiri derijilik wekili t r t ning sahibxanliqida chaqirilghan médiya bashliqlar yighinida uchrashti. yighinda söz qilghan t r t bash mudiri mehmet zayid sobaji: «yer shari xaraktérlik térrorizmgha qarshi eng küchlük küresh qiliwatqan türkiyening dölet igilikidiki axbarat tarqatquchi bolush süpitimizbilen, térrorizmning menbesi wezerbe nishanining qeyer bolushidin qetiynezer, hemmeylenni buninggha qarshi puxta hemkarliq ornitishqa chaqirimiz» dédi.

t r t mu eza bolghan yawropa axbarat tarqitish birleshmisi wekilliri waba sewebidin ikki yildin buyan tunji qétim yüzturane ötküzülgen bir yighinda özara körüshti. t r t ning sahibxanliqida istanbulda ötküzülgen yawropa axbarat tarqitish birleshmisi yighinigha, t r t bash mudiri mehmet zahid sobaji we yawropa tarqitish axbarat birleshmisining bash diréktori noél kuran, hemde 41 dölettiki axbarat tarqitish orunlirining 200 ge yéqin yuqiri derijilik wekili qatnashti. ikki kün dawamlishidighan bu paaliyette, ammiwi axbarat (dölet igilikidiki) tarqitishning kelgüsi, hel qilinishi kérek bolghan qiyinchiliqlar, yéngi yüzlinishler we yashlarni jelp qilish dégendek nurghun mesililer muzakire qilinidu.

«jumhur reisimizning <dunya beshtin chong> dégen shoari, hemmimizning ortaq we bixeter kelgüsige sélinidighan yégane mebleghning xulasisi»

bashliqlar yighinining échilish nutuqini sözligen t r t bash mudiri mehmet zahid sobaji, aridin uzun waqit ötkendin kéyin yüzturane ötküzülgen 2022-yilliq yawropa axbarat birleshmisi bashliqlar yighinigha sahibxanliq qilghanliqliridin hayajanliniwatqanliqini bildürdi. eneniwi qimmet qarishimiz bolghan bitereplik, adilliq we durustluqning kelgüsining reqemlik taratquliriningmu özgermes ölchimi bolushi kéreklikini tekitligen sobaji: «bu meqsetni boylap, yawropa axbarat birleshmisi ezasi bolush süpitimiz bilen, her daimki hemkarliq rohini saqlap, téximu bixeter kelgüsi berpa qilish, hemde axbarat tarqitish medeniyitimizning béyishi üchün ortaq we ijadiy teshebbuslar bilen hemkarliqimizni kücheytidighan we kéngeytidighanliqimizdin qetiy gumanlanmeymen. shuni untumasliqimiz kérekki, biz birlikte téximu küchlük bolalaymiz» dédi.

bügünki künde dunyadiki eng muhim axbarat wasitilirining birige aylanghan t r t ning 18 téléwiziye qanili, 17 radiyo qanili bilen birlikte, 9 reqemlik supisi, reqemlik epliri hemde dölet ichi – sirtidiki nurghun paaliyetler arqiliq türkiyede axbarat tarqitishning bashlamchisi bolush ornini saqlap kelgenlikini bildürgen t r t  bash mudiri sobaji, sözini dawamlashturup: «hazir biz insanlar we jughrapiyelik orunlarni ayrip olturmastin, dunyani bir pütün halette körüshimiz؛ her bir insanni qimmetlik dep qarap, uni nezerdin saqit qilishning mesilini hel qilishning charisi emeslikini tonup yétishimiz lazim. jumhur reisimiz rejep tayyip erdoghan ependining xelqaraliq supilarda daim otturigha qoyup kéliwatqan «dunya beshtin chong» dégen shoari, téximu adil dunya sistémisi qurushning négizidur؛ hemmimizning ortaq we bixeter kelgüsige sélinidighan yégane mebleghning xulasisidur. derweqe, türkiye nöwette dunyaning tinchliq zémini süpitide, rehberler eng muhim xelqaraliq mesililerni chöridep bir yerge jem bolidighan, dunya jamaiti xush xewerlerni kütidighan, medeniyet uchrishishliri we hel qilish teklipliri otturigha qoyulidighan kem uchraydighan döletlerning biri. bu arqa körünüshte, biz yawropa axbarat tarqitish birleshmisimu köngül bölidighan bir mesile süpitide, yashlar bilen ammiwi axbarat tarqitishning munasiwitini aldinqi orungha qoyidighan, ularning yer shari xaraktérlik mesililerge bolghan köz qarishi we hel qilish charisi tekliplirini otturigha qoyidighan tetqiqatlarni élip bériwatimiz» dégenlerni qeyt qildi.  sobaji t r t ning xelqaraliq xewer supiliri heqqidimu toxtilip: «t r t bolush süpitimiz bilen, bügün téléwiziye we radiyo qanallirimiz, reqemlik supilirimiz bilen dunyaning yette qitesige 41 til we diyaléktta tarqitish bériwatimiz. t r t World din bashqa, reqemlik xewer supilirimiz t r t némische, t r t rusche, t r t erebchige yéqinda t r t firansuzchinimu ilawe qilip, xelqaraliq tarqitish ailimizning eng yéngi ezasining qurulghanliqini tebrikliduq. buningdin bashqa, bizning afriqa, balqan we pars tilliridiki reqemlik xewer supilirini échish xizmetlirimiz dawamlishidu» dédi.

«térrorizmning menbesi we nishani qeyer bolushidin qetiynezer birlikte qarshi turush nuqtisida saghlam hemkarliq ornitishni chaqiriq qilimiz»

kirizislar, mesililer we özgirishlerni dijitallishish musapisidin ayrim chüshinishning mumkin emeslikini tekitligen mehmet zayid sobaji, yawropa ittipaqi axbarat bashliqlar yighinida tarixiy chaqiriq qildi.

u: «biz dölet axbaratchiliri bolush süpitimiz bilen, xata uchur we meqsetlik uchur tarqitishqa qarshi barliq küchimiz bilen küresh qilidighan muhim idare-organlar hésablinimiz. dölet axbaratchiliri bolush süpitimiz bilen mesuliyitimiz buning bilenla cheklinip qalmaydu. ashqunluq, kirim adaletsizliki, dunyawi térrorizm, intérnét tor bixeterliki we ékologiyelik mesililer toghrisida jemiyetni melumatqa ige qilishimiz kérek. dunyawi térrorizmgha qarshi eng küchlük küresh qiliwatqan türkiyening axbarat orgini bolush süpitimiz bilen, térrorizmning menbesi we nishani qeyer bolushidin qetiynezer birlikte qarshi turush nuqtisida saghlam hemkarliq ornitishni chaqiriq qilimiz» dédi.

«türkiye amérikadin qalsila qisimliq téléwiziye filimliri éksportida ikkinchi orunda turidu»

mehmet zayid sobaji t r t ning qisimliq téléwiziye filimliri we ortaq filim ishlesh jehettiki muweppeqiyiti bilen dijital xizmetliri heqqidimu toxtaldi.

u mundaq dédi:

«dunyaning t r t qisimliq téléwiziye filimlirigha qiziqiwatqanliqi toghrisida toxtilishni xalaymen. türkiye amérikadin qalsila qisimliq téléwiziye filimliri éksportida ikkinchi orunda turidu. bu muweppeqiyet netijiside idarimizning dunya miqyasida qisimliq téléwiziye filimlirini sétish sahesidiki xizmetlerge bashchiliq qilishini éghizgha almay turalmaymiz. qisimliq téléwiziye filimliri, ortaq ishlengen filimlar we qonchaq filimlirige bolghan telep intayin yuqiri. kéyinki aylarda xelqara t r t dijital widéo supimizni ishqa kirishtürüsh üchün tirishiwatimiz. bu dijital supa we teyyarlinidighan yéngi mezmunlar؛ buning bilen birlikte yene, yawropa ittipaqi axbarat birleshmisining iqntérnét tori élish-sétish sistémisi sunghan imkaniyetler hemde özara hemkarliq pursetliridin téximu köp paydilinishimizgha imkaniyet yaritip béridu. t r t waba mezgilide yawropa axbarat birleshmisining <Content Appeal> nami astida bashlighan we eza bolghanlar heqsiz pirogrammigha érisheleydighan pirogramma munderijisi yumtaligha, höjjetlik filim, dramma qatarliq oxshimighan katégoriyeler boyiche aktip hesse qoshti. buning bilen birge, t r t kino filimi sahesidimu xelqaraliq hemkarliqlarni künséri téximu ünümlük halgha keltürüp, özi heqqidiki qiziqishni kücheytiwatidu. yéqinqi üch yilda t r t hemkarliship ishligen kino filimliri, kan, bérlin, karlowi wari, wénédik, san sébastiyan, warashawa we lokarno qatarliq 300 din artuq döletlik hemde xelqaraliq filim féstiwallirida texminen 275 mukapatqa érishti. t r t xelqaraliq filim féstiwallirida bérilgen t r t alahide mukapatliri, bashqa idare-organlar bilen bolghan hemkarliqliri bilenmu, bu sahediki hemkarliqlargha töhpe qoshuwatidu.»

yawropa ittipaqi axbarat birleshmisining bash diréktori noél kurran sözini t r t gha bu katta yighingha sahibxanliq qilghanliqi üchün teshekkür éytish bilen bashlidi.

u: «bizning bille bolushimiz intayin qimmetlik. biz bu pursette t r t bilen bolghan hemkarliqimizni ashurushni ümid qilimiz» dédi.

yawropadiki ammiwi axbarat tarqitish wasitilirini bir yerge toplash meqsitide qurulghan yawropa ittipaqi axbarat birleshmisi dunyadiki eng muhim ammiwi axbarat organlirining birleshmisidin biri bolup hésablinidu.