türkiye yemende urush toxtitish kélishimi hasil qilinishidin xursen ikenlikini bildürdi

türkiye awazi radiyosi xewiri: türkiye tashqi ishlar ministirliqi teripidin élan qilinghan yazma bayanatta, enqerening, yemende terepler otturisida birleshken döletler teshkilatining teshebbuslirigha asasen, ramizan éyining bashlanghuchidin étibaren uda 2 ay urush toxtitish kélishimi hasil qilinishidin xursen ikenliki, bu ijabiy qedemdin kéyinla, yemen miqyasida uzaq mezgillik urush toxtitish we kirizisni siyasiy yollar bilen hel qilish charisi tépish yolida qedemlerning tashlinishini ümid qilidighanliqi eskertildi, türkiyening bu basquchta, birleshken döletler teshkilati alahide wekilining tirishchanliqlirini qollash, barliq tereplerni  diyalog ornitish we muresselishishke teshwiq qilish hem yemen xelqini qollashni dawamlashturidighanliqi tekitlinip mundaq déyildi: «yemendiki ixtilapning birleshken döletler teshkilati xewpsizlik kéngishining qararliri we belgilengen xelqaraliq paramétirlar dairiside, diyalog arqiliq we asasiy qanun boyiche hel qilinishi, rayonimizda uzaq mezgillik bixeterlik we muqimliq ornitishta intayin muhim dep qaraymiz.»

birleshken döletler teshkilati yemen alahide wekili hans grundbérg, tünügün yemen hökümiti bilen husiylarning, hawa, quruqluq we déngizdiki herbiy heriketlirini toxtitish toghruluq pütüshkenlikini uqturghanidi.

yemendiki urush toxtitishning, bügün shu jay waqti 19:00 da küchke ige bolushi kütülmekte.

yemendiki iran qollawatqan husiylar, 2014-yili séntebirdin buyan paytext sana we bir qisim rayonlarni kontrol qilip kelmekte. seudi erebistan bashchiliqidiki ittipaqdash küchliri bolsa, 2015-yili marttin étibaren husiylargha qarshi yemen hökümitini qollap kelmekte.

igilinishiche, dunya boyiche eng namrat döletlerdin biri bolghan yemende, ichki urush sewebidin, insaniy tiragédiye qorqunchluq derijige bérip yetken.