nato tashqi ishlar ministirliri yighinida ukraina-rusiye urushi muzakire qilinidi

türkiye awazi radiyosi xewiri: tashqi ishlar ministiri mewlüt chawushoghlu biryusséldiki nato merkizide, ukraina-rusiye urushi muzakire qilinidighan nato tashqi ishlar ministirliri yighinigha qatnashti.

u yighin axirlashqanda, firansiye tashqi ishlar ministiri lé jriyan bilen körüshti.

u yighin bashlinishtin ilgiri engliye tashqi ishlar weziri liz trus we ruméniye tashqi ishlar ministiri bogdana orésku bilen körüshken idi.

u twittérda bayanat élan qilip, trus we bogdana orésku bilen, ukrainaning nöwettiki weziyiti we köp tereplik munasiwetlerni muzakire qilghanliqlirini qeyt qildi.

u türkiye puqralirini ukrainadin tarqaqlashturushqa qilghan yardimi üchün, ruméniye tashqi ishlar ministiri bogdana oréskugha teshekkür éytti.

u tünügün (3-mart) ukraina tashqi ishlar ministiri kuléba bilen körüshüp, ukraina weziyitini muzakire qilghan idi.

u körüshüshte, rusiye bilen ukrainaning puqralarni tarqaqlashturush üchün rayonluq sewiyede bolsimu insaniy karidor tesis qilish mesiliside pikir birliki hasil qilghanliqidin türkiyening memnunluq hés qilghanliqini bildürdi.

u mezkur karidorning puqralarni tarqaqlashturush imkaniyiti yaritip béripla qalmastin yene, bu rayonlargha insanperwerlik yardemliri yetküzüshni asanlashturup béridighanliqini qeyt qildi.

ukraina-rusiye heyetliri tünügün (2022-yili 3-mart) ikkinchi qétimliq körüshüshni emelge ashurghan bolup, puqralarni tarqaqlashturushta rayonluq insaniy karidor tesis qilish mesiliside pikir birliki hasil qilghan idi.