erdoghan: biz qolgha keltüridighan tereqqiyat yashlirimiz üchün intayin muhim
jumhur reis rejep tayyip erdoghan özliri qolgha keltüridighan tereqqiyatning süpiti, muqimliqi we adaletlik kirim teqsimatini ishqa ashurush we yashlargha yéngi xizmet pursiti yaritip bérishning özliri üchün intayin muhim ikenlikini éytti.
türkiye awazi radiyosi xewiri: jumhur reis erdoghan, 27 – nöwetlik 5 - qanun chiqirish yilining bashlinishi munasiwiti bilen türkiye büyük milliy mejlisi omumiy kéngishige xitab qildi.
nutiqida, yéngi asasiy qanun, térrorizm, iqtisad, diplomatiye, rayonluq we xelqaraliq mesililer heqqide toxtalghan jumhur reis erdoghan, mundaq dédi: «dölitimizning sehiye ul esliheliri we adem küchi bayliqigha salghan mebleghlerning méwisini mushundaq krizis mezgilide toluq alghanliqimizdin intayin xushalmiz. biz qolgha keltüridighan tereqqiyatning süpiti, muqimliqi we adaletlik kirim teqsimatini ishqa ashurush we yashlargha yéngi xizmet pursiti yaritip bérish bizge nisbeten intayin muhimdur.»
yer shari xaraktérlik mesile bolghan kilimat özgirishi kirizisi toghriliqmu toxtalghan jumhur reis erdoghan, mundaq dep körsetti: «parizh kilimat kélishimini parlaméntqa sunush qararimiz, biz qozghighan yéshil tereqqiyat inqilabiningmu tunji xush xewiridur.»
u, süriye mesilisi toghruluq qilghan sözide, xelqara jemiyetning köchmenler éqinini bashqurush mesiliside qanchilik derijide ajizliqining ayan bolghanliqini eskertip mundaq dédi: «türkiye öz aldighila 4 milyon mezlumni baghrigha bésiwatqan bir peytte, bir qanche ming musapirning aldida alaqzade bolup, insaniy pezilettin yiraq pozitsiyelerde bolghanlarmu otturigha chiqti, bu insaniy pezilettin xaliy pozitsiyening sahibliri yene, musapirlarning heq – hoquqlirigha munasiwetlik birleshken döletler teshkilatining qararlirinimu depsende qilmaqta؛ aqdéngizning qaranggha sulirida her yili qanche ming kishi ümid sepiride hayatidin ayriliwatqanliqi toghruluq istatistikiliq melumatlar toplinalmwatidu, halbuki, peqet bu mesililerning özila wijdaniy, exlaqiy peziletke ige we kishilerge hörmet qilidighan jemiyetlerni heriketke keltürüsh üchün yéterlik bolushi kérek idi.»