türkiye bayriqi bakudiki heyder eliyéw merkizige eks ettürüldi
ezerbeyjanning paytexti bakuning yéngi binakarliq simwolliridin biri bolghan heyder eliyéw merkizining aldi teripige, türkiyening dala ot apitige qarshi kürishini qollash meqsitide türkiye bayriqi eks ettürüldi.
türkiye awazi radiyosi xewiri: hilal ay yultuzluq türkiye bayriqini bakudiki heyder eliyéw merkizige eks ettürüsh paaliyitige, ezerbeyjan muawin tashqi ishlar ministiri fariz rzayéw, türkiyening bakuda turushluq bash elchisi jahit baghji, ezerbeyjanda yashawatqan türkiye puqraliri we bakuluqlar ishtirak qildi.
türkiyening bakuda turushluq bash elchisi jahit baghji, zhurnalistlargha bergen bayanatida, dala ot apetlirining birinchi küni ezerbeyjanning ayropilan bilen türkiyege ot öchürüsh xadimlirini ewetkenlikini eskertish bilen bir waqitta, shu kündin buyan ezerbeyjanning türkiyege izchil yardem bériwatqanliqini, jümlidin ezerbeyjanning türkiyege ot öchürüsh mashinisi, ot öchürüsh xadimliri, tik uchar we ot öchürüsh ayropilani ewetkenlikini tekitlep mundaq dédi: «hörmetlik pirézidént ilham eliyéwning yolyoruqigha asasen élip bériliwatqan bu paaliyet, dölitimizge nisbeten menilik hem qimmetliktur.»
ezerbeyjanning bu pozitsiyesining «hemishe derdingizge derman bolushqa teyyarmen qérindishim» pozitsiyesi ikenlikini éytqan baghchi, ezerbeyjan pirézidénti ilham eliyéwni öz ichige alghan barliq ezerbeyjan dairiliri we ezerbeyjan xelqige minnetdarliq bildürdi, hemde türkiye xelqining ezerbeyjanning yardimini körgenliki hem chongqur hés qilghanliqini eskertip mundaq dédi: «xelqimiz bu yardemni héchqachan untumaydu.»
ezerbeyjan muawin tashqi ishlar ministiri fariz rzayéw, musheqqetlik künlerde qérindash türkiyege dost qolini sunushning özlirining meniwi burchi ikenlikini éytti, hemde ezerbeyjan döliti we xelqining, musheqqetlik künlerdimu, xushalliq künlerdimu hemishe qérindash dölet türkiyening yénida bolidighanliqini qeyt qildi.
