erdoghan bilen eliyéw «shusha bayannamesi» ni imzalidi

türkiye awazi radiyosi xewiri: jumhur reis rejep tayyip erdoghan aridin 28 yil ötkendin kéyinö erméniyening ishghaliyitidin azad qilinghan taghliq qarabaghning simwol shehiri shushada, ezerbeyjan pirézidénti ilham eliyéw teripidin resmiy murasim arqiliq qarshi élindi.

shusha waliy mehkimisidiki qarshi élish murasimidin kéyin, eliyéw bilen erdoghan ayrim körüshti.

körüshüshtin kéyin, erdoghan bilen eliyéw ikki dölet otturisida «shusha bayannamesi» ni imzalidi.

jumhur reis rejep tayyip erdoghan imza murasimidin kéyin ötküzülgen qoshma axbarat élan qilish yighinida, «shusha bayannamesi» arqiliq ikki dölet munasiwetlirining yéngi dewrdiki yol xeritisini sizip chiqqanliqlirini eskertish bilen bir waqitta, 44 künlük urushtin kéyin taghliq qarabaghning öz igilirining qoligha ötkenlikini we erméniyening ishghaliyitidin azad qilinghanliqini tekitlep mundaq dédi: «ezerbeyjan xelqining qarabagh zepirini yene bir qétim tebrikleymen.»

türkiye döliti bolush süpiti bilen musteqilliq kürishidikige oxshashla qayta qurup chiqish paaliyetliridimu ezerbeyjangha her jehettin hesse qoshushni dawamlashturidighanliqlirini qeyt qilghan jumhur reis rejep tayyip erdoghan, taghliq qarabaghning tekrar burunqi awat halitige we öz kimlikige ige bolidighanliqini, bir tereptin, weyranchiliqning ornini toldurush xizmiti dawamlashsa, yene bir tereptin, taghliq qarabagh we ezerbeyjan térritoriyelirining qayta bundaq bir palaketke duch kelmesliki üchün kéreklik tedbirlerning yolgha qoyulidighanliqini éytti.

hemmini ezerbeyjanning zepirini qobul qilishqa chaqirghan jumhur reis rejep tayyip erdoghan, mundaq dep körsetti: «erméniyening özige sunulghan yaxshi niyet we hemkarliq qolini tutush pursitini ching tutushini ümid qilimiz, 6 tereplik munber (rusiye, ezerbeyjan, erméniye, giruziye we iran) bilen birlikte buningdin kéyin rayonning tinchliq  ichide birge yashighili bolidighan bir rayongha aylinishini arzu qilimiz. biz qérindishim (eliyéw) bilen birlikte her türlük pidakarliqni körsitishke teyyarmiz.»

istiratégiyelik aliy hemkarliq kéngishi yighinini aldimizdiki aylarda türkiyede chaqiridighanliqlirini éytqan jumhur reis rejep tayyip erdoghan, 1 – aprél küni ishqa kirishtürülgen kimlik bilenla sayahet qilish belgilimisining, özara munasiwetlerni qolaylashturup, ikki döletni bir - birige téximu yéqinlashturidighanliqini qeyt qildi.

u yene, türkiye döliti bolush süpiti bilen nahayiti uzun tarixqa ige shushada eng qisqa waqit ichide bash konsulxana échishni pilanlawatqanliqlirinimu sözlirige ilawe qildi.

ezerbeyjan pirézidénti ilham eliyéw bolsa, «shusha bayannamesi» ning, kelgüsidiki ikki dölet otturisidiki hemkarliqning kapaliti ikenlikini eskertish bilen bir waqitta, qarabagh urushi bashlanghan kündin tartip hazirghiche jumhur reis rejep tayyip erdoghanning, ezerbeyjanni ochuq – ashkara halda  qollaydighanliqini pütkül jahangha jakarlighanliqini tekitlep mundaq dédi: «biz bu urushta türkiye xelqining hemkarliqi we yardimini körduq,  türkiyening bu yardemlirini esla untumaymiz.»

u yene, türkiye bilen ezerbeyjan otturisida imzalanghan «ittipaqdashliq kélishim layihesi» ning, buningdin 100 yil burun imzalanghan «qars kélishimi» ge asaslinidighanliqinimu sözlirige ilawe qildi.