türkiye hawa tewelikidin eng köp ayropilan uchup ötken

türkiye awazi radiyosi xewiri: türkiye qatnash ministiri adil karaismailoghlu pütkül dunyada wuxen wirusi(Kovid-19)  sewebidin ayropilan seperlirige cheklimiler qoyulghan bolsimu, mushu yilning deslepki töt ayliq mezgilide türkiye hawa tewelikidin otturiche hésab bilen 27 sékuntta bir ayropilanning uchup ötkenlikini bildürdi.

ministir karaismailoghlu anadolu agéntliqigha bayanat bérip, ötken yili (2020) ning béshidin tartip pütkül dunyagha tesir körsetken wuxen wirusi sewebidin ayropilan seperlirige bezi cheklimilerning qoyulghanliqini, emma mushu yilning deslepki töt éyida tranzit uchushlarni öz ichige alghan halda ichki linyelerde 185 ming 156 ayropilan sepiri, chet el linyeside 84 ming 201 ayropilan sepirining emelge ashqanliqini qeyt qildi.

u: «bu yilning aldinqi töt éyida türkiye hawa tewelikidin jemiy 385 ming 40 ayropilan uchup ötti. mundaqche éytqanda, türkiye hawa tewelikidin 27 sékuntta bir ayropilan uchup ötti. waba sewebidin pütkül dunyada yoluchilar sani azayghan bolsimu, yolgha qoyghan tedbirlirimiz sayisida yoluchilirimiz awiyatsiye bixeterliki astida seperlirini dawamlashturuwatidu. jumhuriyet tarixidiki eng büyük sélinmilardin biri bolghan istanbul ayrodurumi dunyadiki nurghun chong ayrodurumlarni arqida qaldurup, yoluchi, ayropilan we yük toshushta yawropa birinchisi bolushni emelge ashurdi. bashqa ayrodurumlirimizmu waba mezgilide muhim sinaqlardin ötti. bu jehette, dölitimiz yawropada aldinqi orunda turidighan hawa qatnishi kontrol merkezlirini arqida qaldurup, hawa qatnishi bashqurushida birinchi boldi we bu muweppeqiyetlirini dawamlashturuwatidu» dédi.