erdoghan jalalidin rumi wapatining 747 yilliqi munasiwiti bilen télégramma tarqatti

türkiye awazi radiyosi xewiri: erdoghan türk- islam mutepekkuri we sopi mewlane jalalidin rumi wapatining 747 yilliqi munasiwiti bilen télégramma tarqatti.

jumhur reis erdoghan télégrammisida töwendikilerni tilgha aldi, «wapat bolghanliqining 747 yilliqida anadoluning meniwi binakarliridin ulugh mutesewwup, mutepekkur we islam alimi mewlane jalaliddin rumini séghinish ichide esleymen.

rebbimning bizni, xelqimizni we pütkül insaniyetni hezriti mewlanening guwahliqigha nésip qilishini ümid qilimen.

gerche uning wapat bolghinigha yette yérim esir bolghan bolsimu, emma hezriti mewlaneni «hemishe yéngi péti» tutup turghan sir ishiq we söygüdur.

hezriti mewlane «allahqa yétishning nurghun yollirini qoyup u muhebbetni tallidi», u bu sözini söygü bilen sözlidi we bu yerlerni muhebbet soghurdi.

mewlanening qelb süzgüchliridin ötken nesihetliri, pitne – pasat, buzuqchiliq we hesetxorluqni yoqitip, dewr we chégralardin halqighan qérindashliq muhitining berpa qilinishigha wasite boldi.

derweqe, yézilip yette yérim esir ötkendin kéyinmu, nurghun til, din we medeniyetke tewe milyonlighan kishiler uning eqil-paraset deryasidin behrimen bolmaqta, xatirjemlik we sukunatni mesnewi sherifning tengdashsiz chongqurluqliridin izdimekte.

biz bir pütün millet süpitide bilen, esirlerdin halqip kelgen mushundaq mol meniwi xezinige ige bolghanliqimiz üchün allahqa hemdu éytimiz.

yene bir jehettin, dunyadiki namratliq, bextsizlik, nadanliq we ziddiyetlerge nezer salidighan bolsaq, zamanimiz kishilirining rumining tinchliq we muhebbet uchurigha qanchilik mohtaj ikenlikini köreleymiz.

insanlarni, dunyani qutuplishishqa ittiriwatqan kor idéologiyeler, hemmimizni xeterlik nuqtigha sörep kirmekte.

gherb jemiyetliride medeniyet irqchiliqi, chet elliklerge öchmenlik qilish we islam düshmenliki kündin- künge zeherlik notigha oxshash yéyilmaqta.

pikir erkinliki toni astida muqeddes jay we zatlirimizgha hujum qilinmaqta. étiqadi, tili we kiyinishi sewebidin insanlar düshmenleshtürülmekte.

türkiye bolush süpitimiz bilen, bu qorqunchluq kartinigha qarshi hezriti mewlanening adimiylik, söygü, tinchliq, keng qorsaqliqni merkez qilghan mubarek tewsiyelirining bayraqdarliqini qilmaqtimiz.

biz hezriti mewlanedin alghan ilhamgha tayinip, tili, irqi we dinining qandaq bolushidin qetiynezer barliq kishilerge yardem qolini sunmaqtimiz, rayonimizda tinchliq we adaletning hökümran bolushi üchün tirishchanliq körsetmektimiz.

öltürüsh, qetl qilish we xaniweyran qilishtin bashqa héchnémini bilmeydighan yéngi dewrning qaraqchilirigha qarimay, biz mewlane tutashturghan muhebbet, dostluq we eqil- paraset meshilini kötürüshni dawamlashturimiz.

perwerdigarimdin bizlerni mewlanening ilim we ishqi – muhebbet yolidin ayrimasliqini tileymen.

wapatining 747 – yilida herziti mewlane bashta bolup barliq köngül sultanlirimizni séghinish ichide esleymen, bu kéche qilinidighan dua, sélinidighan sama we ewradi sheriflerning allahning dergahida qobul bolushini tileymen.»