türkiye yawropa parlaméntigha qattiq naraziliq bildürdi

türkiye awazi radiyosi xewiri: türkiye tashqi ishlar ministirliqi bayanatchisi hami aqsoy, yawropa parlaménti omumiy kéngishida, taqaq marash we qibris mesilisige munasiwetlik qobul qilinghan qarar heqqidiki soalgha bergen yazma jawabida, mundaq dédi: «yawropa parlaménti omumiy kéngishining, dölitimiz we shimaliy qibris türk jumhuriyitige munasiwetlik ijra qildurush küchige ige bolmighan tewsiye qararini pütünley ret qilimiz. bu heqte, shimaliy qibris türk jumhuriyiti jumhur reislik sariyi teripidin élan qilinghan bayanatni pütünley qollaymiz. jenubiy qibris rum hakimiyitining zorlap tangghanliqida qilche shübhe bolmighan bu qarar, yawropa parlaméntining qibris mesiliside heqiqetlerdin tolimu yiraq hem gumaniy qarashta ikenlikini yene bir qétim ispatlap berdi. bu pozitsiye we idéologiyede ching turghan teqdirde, yawropa parlaménti organlirining  qibris mesilisining hel qilinishigha ijabiy hesse qoshalishi mumkin emes. türkiye – yawropa ittipaqi munasiwetlirining qibris mesilisi arqiliq görüge éliwélinishi, ne yawropa ittipaqining omumiy menpeetlirige, ne qibris mesilisining hel qilinishigha, ne qoshnidarchiliq munasiwetlirining yaxshilinishigha héchqandaq paydisi yoqtur. yawropa parlaménti bilen yawropa ittipaqini, qibris arilidiki heqiqetler bilen yüzlishishke, qibris türk xelqining mewjudiyitini étibargha élishqa, hemde yawropa ittipaqining 2004 – yili aprélda qibris türklirige bergen wedilirige emel qilishqa chaqirimiz. türkiyening hem özining hemde qibris türklirining heq – hoquqlirini héchqandaq bir tehdit we heywige qilche bash egmestin,  adaqqiche qoghdash iradisi qetiydur. shuning bilen bir waqitta, türkiye, öz waqtida diyalog ornitish we muzakire ötküzüsh tirishchanliqlirinimu üzlüksiz dawamlashturidu.»

yawropa parlaménti, qibrista taqaq marash rayonining bir qismini échish qararidin waz kéchilishini, qibris mesilisining ikki xelqliq, ikki rayonluq fédératsiyelik tüzümge asasen hel qilishni nishan qilidighan muzakirilerning qaytidin bashlitilishini, yawropa ittipaqining türkiyege émbargo yürgüzüshini telep qilghanidi.