exlaqsiz hejiwiy resimge lenet yaghdi

türkiye awazi radiyosi xewiri: türkiye muawin jumhur reisi fuat oktay firansiyening ongshalmas qalduq zhurnili charli hébdoning, jumhur reis rejep tayyip erdoghangha munasiwetlik exlaqsiz sanini lenetligenlikini bildürdi.

muawin jumhur reis fuat oktay twittérda hembehirligen uchurida: «pikir erkinliki nami astigha yoshurunup héchkimni aldiyalmaysiler! ongshalmas firansiye qalduqining jumhur reisimizge munasiwetlik chiqarghan exlaqsiz sanini lenetleymen. exlaq we wijdani bar xelqaraliq jamaetchilikni bu rezillikke qarshi awazini yuqiri kötürüshke chaqirimen» dédi.

edliye ministiri abdulhamit gülmu twittérda uchur hembehirlidi.

u: «yawropaning insaniy qimmetlerdin nésiwini alalmighan fashistlar, pikir erkinlikining némilikini bilmeysiler. siler ötmüshtin bügüngiche toplighan qanunsiz, exlaqsiz we nomussizliqqa tolghan sehipenglargha her küni bir yéngisini qoshuwatisler. shuni bilip qélinglar we eqlinglardin chiqarmanglar: jumhur reis rejep tayyip erdoghan hergizmu yalghuz emes» dédi.

jumhur reislik sariyi bayanatchisi ibrahim kalin twittérda jumhur reis rejep tayyip erdoghanni nishan qilghan namdiki «hejwiy resim» basqan charli hébdo zhurnilini eyiblidi. u mundaq dédi:

«héchqandaq étiqadqa, muqeddes we meniwi qimmetke nisbeten hörmiti yoq firansiye zhurnilining, jumhur reisimizge munasiwetlik sanini shiddet bilen eyibleymiz. bular özlirining setchiliklirini we exlaqsizliqlirini ashkarilap béridu. kishining heq-hoquqigha hujum qilish, hejiwiylik we pikir erkinliki emes.»

jumhur reislik uchur-alaqe idarisining bashliqi fahrettin altunmu twitétrda bu heqte uchur hembehirlidi.

u: «bu zhurnalning medeniyet irqchiliqi we nepretni tarqitishtki yirginishlik tirishchanliqini eyibleymiz. bu atalmish hejiwiy resimler insaniy exlaqtin yoqsun bolghinidek, nahayiti yirginishlik. bu éniqki firansiye rehbirining öz döliti üchün arzu qilghan chet elliklerge düshmenlik qilish, islam öchmenliki we chidighusiz medeniyet muhitining mehsuli» dédi.

u türkiyening puqralargha her türlük zorawanliq we islam namidiki her türlük térrorloq herikitige qarshi ikenlikini eskertip, sözini mundaq dawamlashturdi:

«irqchi, chet elliklerge düshmenlik qilish, islam qorqunchi we yehudiy düshmenlikidek ighwagerchilikler, bizni oxshash usulda jawab qayturushqa küshkürtmeydu. jumhur reisimiz dunyawi wijdanning awazi bolushni dawamlashturidu. türkiye küchlinidu. fashizm we fashistlar meghlub bolidu. barliq eqli jayida bolghan yawropaliq dostlarni bu xil iptidai medeniyet irqchiliqigha, eqliy kemtüklükke we medeniyetsiz gep-sözlerge qarshi küresh qilishqa chaqirimiz.»

adalet we tereqqiyat partiyesi(AK Parti)  bayanatchisi ömer chelik charli hébdo zhurnilini eyiblep mundaq dédi: «bu ang, kishining könglini ileshtüridighan nuqtigha yetti. jumhur reis rejep tayyip erdoghanning qetiy meydani, bu nepret sépining ikki yüzlimichi exlaqsizliqini üstelde we meydanda dawamliq meghlub qilidu. étiqadlargha hörmet qilidighan barliq kishilerni mezkur zhurnalning öchmenlikke tolghan sanini lenetleymen.»