erdoghan mérkél bilen mishélning gheyretliridin memnun ikenlikini éytti
türkiye jumhur reis rejep tayyip erdoghan diyalog qanallirini janlandurush nuqtisida hasil qilinidighan kélishimning qandaq ilgirilishi kérekliki mesiliside, girétsiyening basidighan qedemlirining muhim ikenlikini bildürdi.
türkiye awazi radiyosi xewiri: jumhur reis rejep tayyip erdoghan yawropa ittipaqi kéngishining bashliqi charliz mishél we gérmaniye bash ministiri angéla mérkél bilen körüshti.
jumhur reislik uchur-alaqe idarisi üch terep körüshüshi toghrisida bayanat élan qilip, widéo konférans sheklide ötküzülgen üch terep yighinida, türkiye-yawropa ittipaqi munasiwetlirining keng dairide muzakire qilinghanliqini bildürdi.
sherqiy aqdéngizdiki özgirishlermu muzakire qilinghan yighinda, türkiye bilen girétsiyening uchrishishlarni bashlashqa teyyar ikenliki qeyt qilindi.
rejep tayyip erdoghan diyalog qanallirini janlandurush nuqtisida hasil qilinidighan kélishimning qandaq ilgirilishi kérekliki mesiliside, girétsiyening basidighan qedemlirining muhim ikenlikini bildürüp, qibris türklirini öz ichige alghan barliq tereplerning qatnishishi bilen ötküzülidighan rayon xaraktérlik konféranstin ijabiy qararlarning chiqidighanliqigha ishinidighanliqini qeyt qildi.
peyshenbe (2020-yili 24-séntebir) bashlinidighan yawropa ittipaqi rehberler yighinining, türkiye-yawropa ittipaqi munasiwetlirige yéngi nepes élip kélishini ümid qilidighanliqini eskertken rejep tayyip erdoghan, yaxshi niyet bilen tamozhna birleshme kélishimi, wiza erkinliki we köch kélishimi mesililiride konkrét qedemler bésilghan ehwalda, türkiye-yawropa ittipaqi munasiwetlirining qaytidin ijabiy sewiyege chiqidighanliqidin guman qilmaydighanliqini bildürdi.
rejep tayyip erdoghan yawropa ittipaqining türkiye bilen saghlam bolghan hemkarliqni tereqqiy qildurushining rayonluq mesililerning hel qilinishigha hesse qoshidighanliqini, mérkél bilen mishélning türkiye-yawropa ittipaqi munasiwetlirige musbet küntertip yaritish gheyretliridin memnun ikenlikini bildürdi.
