fahrettin alton bilen ömer chelik jo baydingha qattiq inkas qayturdi

türkiye awazi radiyosi xeweri: jumhur reislik sariyi uchur - alaqe ishliri idarisi bashliqi fahrettin altun jo baydinning bayanliri heqqide toxtilip, «türkiye démokratik siyasiy muhitning bundaq mesuliyetsiezlarche bayanatlar arqiliq buzulushigha esla yol qoymaydu. jumhur reisimiz rejep tayyip erdoghanning rehberlikide heqqaniy kürishini izchil dawamlashturidu» dédi.

fahrettin alton ijtimaiy alaqe hésabida hembehirligen uchurida, baydinning dékabir éyida élan qilghan biraq, bügünki künlerde axbarat wasitilirida tarqalghan bayanatlirining, türkiyege qarshi oyniliwatqan suyiqestlik oyunlar we türkiyening ichki ishlirigha arilishish hem dexli-teruz qilish pozitsiyelirining eng roshen namayendisi ikenlikini tekitlidi.

bu bayanatning hem démokratiyege hemde türkiye – amérika munasiwetlirining xaraktérige mas kelmeydighanliqini tekitligen fahrettin alton: «shimaliy atlantik ehdi teshkilatidiki ittipaqdishimiz amérika qoshma ishtatlirining bir pirézidént namzatining démokratiyedimu qilche étibargha élinmaydighan bundaq bimene bayanatlirining hazirqi washington hökümiti teripidinmu qobul qilinmighanliqigha ishinimiz. türkiye suyiqestlik siyasiy oyunlar üchün kozérgha aylanduruwélinidighan bir dölet emes» dédi.

fahrettin alton amérika siyasiy organliri hem jamaetchilikining, kündilik siyasiy menpeetler üchün élan qilinghanliqi ashkara bolghan bu mesuliyetsizlarche bayanlargha süküt qilmastin tégishlik jawab qayturushi démokratiyening teqezzasi ikenlikini tekitlep, «türkiye démokratik siyasiy asmosféraning bundaq mesuliyetsiezlarche bayanatlar arqiliq buzulushigha esla yol qoymaydu, jumhur reisiz rejep tayyip erdoghanning rehberlikide heqqaniy kürishini izchil dawamlashturidu. héchkimning milliy iradimizgha we démokratiyemizge hujum qilish hoquqi yoq. xelqning awazi bilen saylanghan jumhur reisimizning qanunluq salahiyitige til tekküzüsh héchkimning heddi emes. bundaq qilishqa urunghanlar, eng axirqi qétim 2016 – yili 16 – iyul fethullahchi térrorluq teshkilati herbiy – siyasiy özgirish qozghashqa urunghan kéchisi tégishlik jawabqa érishti. bu dostane bir eskertishtur» dédi.

adalet we tereqqiyat partiyesi bayanatchisi ömer chelikmu: «baydin qilghan sözlirining <siyasiy özgirish> xaraktérlik ikenlikini obdan bilidu. buning uqumi <siyasiy özgirish teshebbusi> dur. baydin wénézuéladiki küntertipini türkiyege yötkep béqishqa urunuptu. ötmüshte qorchaq hakimiyetlerde ishqa ashurghan pilanlirini emdiki démokratik döletlerde ijra qilishqa urunuwatidu. buning hem shimaliy atlantik ehdi teshkilati ittipaqdashliqi bilen, hem démokratik idéologiyeler bilen qilche munasiwiti yoq. türkiyening jumhur reisi xelqning iradisi bilen saylinip wezipisini ijra qiliwatidu. jumhur reisimizge qarshi siyasiy pozitsiye yaritish, türkiyege qarshi siyasiy pozitsiye yaritish démektur» dédi.

baydinning, dékabir éyida «öktichilerni qollap, türkiyede hakimiyet almashturghili bolidu» dégen bimene sözlerni qilghanliqi ashkarilanghan idi.