türkiye: hindistanning jammu keshmir qarari weziyetni téximu murekkepleshtürüwetti
türkiye, hindistan asasiy qanunining jammu keshmirning aptonomiyelik salahiyitige alaqidar maddisining emeldin qaldurulushidin buyanqi bir yilda yolgha qoyulghan siyasetlerning jammu keshmirning weziyitini téximu murekkepleshtürüwetkenlikini uqturdi.
türkiye awazi radiyosi xewiri: türkiye jumhuriyiti tashqi ishlar ministirliqi bayanatchisi hami aqsoy, hindistan asasiy qanunidiki keshmirning aptonomiyelik salahiyitige munasiwetlik maddining bikar qilinishining birinchi yilliqi bilen munasiwetlik bir soalgha yazma halette jawab qayturup, «hindistan asasiy qanunining jammu keshmirning aptonomiyelik salahiyitige alaqidar maddisining emeldin qaldurulushidin buyanqi bir yilda yolgha qoyulghan siyasetlerning jammu keshmirdiki weziyetni téximu murekkepleshtürüwetkenliki we rayonning tinchliq we muqimliqigha xizmet qilmighanliqi körülmekte. türkiye bu mesilining diyalog yoli bilen, birleshken döletler teshkilati (b d t) ning körsetmisi, shundaqla munasiwetlik höjjetlirini chöridigen halda hel qilinishi kérekliki toghrisidiki pikrini saqlap kelmekte» dégenlerni qeyt qildi.
hindistan 2019 – yili 5 – awghustta asasiy qanungha özgertish kirgüzüsh arqiliq jammu keshmir rayonining aptonomiyelik salahiyitini bikar qilip, ölkilik hökümetni tarqitiwétip, rayonni merkezge qarashliq ikki ayrim rayongha ayriwetkenidi.
qarardin kéyin hindistan xewpsizlik küchliri jammu keshmir rayonida amanliqni saqlash xizmetlirini kücheytip, xelqning üstidiki bésimni éghirlashturghan, kochigha chiqish cheklimisi bilen birlikte intérnét, téléfon we qatnash cheklimilirini yolgha qoyghan, rayondiki yerlik partiyelerning rehberliri we ezalirini nazaret astigha alghanidi.
