ayasofya jamesi aridin 86 yil ötkende ibadetke échiwétildi
ayasofya jamesi bügün (2020-yili 24-iyul) oqulghan jüme namizi bilen, aridin 86 yil ötkende qaytidin ibadetke échildi.
türkiye awazi radiyosi xewiri: türkiye jumhur reisi rejep tayyip erdoghan ayasofyai kebir jamii sherifke keldi.
u jüme namizidin burun quran kerim tilawet qildi.
jumhur reis rejep tayyip erdoghan istanbul kisiklidiki öyidin chiqip saet 12:00 etrapida ayasofya meydanigha yétip keldi. u meydanda kishilerning qizghin alqishliri bilen qarshi élindi.
türkiye diniy ishlar idarisining bashliqi eli erbash teripidin qarshi élindi we jamege ayasofyai kebir jamii sherif tereptin kirdi.
türkiye büyük millet mejlisi (parlaménti) bashliqi mustafa shentop, muawin juhmur reis fuat oktay, milliyetchi heriket partiyesining bashliqi dewlet baghchelimu ayasofya jamesige keldi.
rejep tayyip erdoghan diniy ishlar idarisi orunlashturghan pirogrammida, quran kerim tilawitini anglidi.
ayasofya jamesining töt muezzini jamening töt munarida salat oqudi. erdoghan munarlardin jaranglighan salatlardin kéyin, süre fatiheni we süre beqerening aldinqi besh ayitini oqudi.
jamaet diniy ishlar idarisining bashliqi eli erbashqa egiship dua qildi.
eli erbash sünnet namizidin kéyin, xutbe oqudi.
u xutbide: «xelqimizning chongqur yürek yarisigha aylanghan hesiriti axirlashti, elihemdulillah. allahqa hemdusanalar bolsun.
ayasofyaning ibadetke échilishi mesjidi eqsa bilen yer yüzidiki barliq mehzun mesjidlerning we mezlum möminlerning jan süyige érishishi bolup hésablinidu. ayasofya jamesining ishikliri, bashqa jamelirimizningkige oxshash, ayrimichiliq qilinmastin allahning barliq qullirigha échiwétilidu. ayasofya jamesining meniwi atmosférasida étiqadqa, ibadetke, tarixqa we tepekkurgha sozulghan yoluchilq, inshaallah üzülmey dawamlishidu» dédi.
u xutbidin kéyin perz namizida imamliq qildi.
ayasofya jamesining ibadetke échilishi, ijtimaiy taratqu munberliridimu qiziq témigha aylandi we hembehirlengen uchurlar twittérda birinchi orungha ötti.
jamening échilish murasimi téléwiziye qanalliridin bashqa taratqu munberliride neq meydandin tarqitildi.
pirogramma, jumhur reis rejep tayyip erdoghanning shexsiy twittér adrésida we ayasofyai kebir jamii sherif nami astida échilghan twittér adréslirida tarqitildi.
