türkiye 5 döletning sherqiy aqdéngiz we liwiye toghrisidiki bayanatigha naraziliq bildürdi

türkiye awazi radiyosi xewiri: türkiye jumhuriyiti tashqi ishlar ministirliqi bayanatchisi hami aqsoy, girétsiye, qibris rim dairiliri, firansiye we ereb birleshme xelipiliki qatarliq besh döletning birleshme bayanatigha alaqidar bir soalgha yazma halette jawab qayturup, «girétsiye, qibris rim dairiliri, firansiye we ereb birleshme xelipiliki tashqi ishlar ministirlirining bügün sherqiy aqdéngiz (sherqiy ottura déngiz) we liwiye mesilisi toghrisida élan qilghan birleshme bayanati, yolgha qoyghan siyasetliri arqiliq rayon xaraktérlik qalaymiqanchiliq we muqimsizliq yaritishning arqisida chépiwatqan, xelqlerning démokratiye ümidlirini isyanchi dikatorilarning biperwalarche hujumlirigha qurban qiliwétishta mesile yoq dep qaraydighan, emma pilanliri türkiye teripidin buzup tashlanghinida ümidsizlikke duchar bolidighan bir türküm döletlerning ikki yüzlimichilikining ibretlik ülgisidur» dédi.

girétsiye we qibris rim dairilirining sherqiy aqdéngiz mesiliside türkiye we shimaliy qibris türk jumhuriyti bilen diyalog ornitishning ornigha mesile bilen alaqisi bolmighan rayon sirtidiki aktiyorlardin medet kütüshining, béqindi we mustemlikichi logikining mehsulidin bashqa nerse emeslikini eskertken aqsoy, türkiyening xelqara qanunni asas qilghan yolluq menpeetlirini qoghdash yolida tashlighan qedemlirining naheq we qanunsiz sewebler bilen burmilinishigha qetiy yol qoyulmaydighanliqigha isharet qildi.

u, bu ehwalning misir üchünmu küchke ige ikenlikini, bu dölet rehberlirining öz xelqining menpeetlirini we xelqini qoghdashtin alliqachan waz kechkendek körünüwatqanliqigha isharet qildi we sözini dawamlashturup, «sherqiy aqdéngiz bilen héchqandaq alaqisi bolmighan ereb birleshme xelipilikini bashqa döletler bilen bir jaygha jem qilghan amil türkiye düshmenlikidin bashqa nerse emes. bu döletning hem bizge hem liwiyege munasiwetlik ötmüshi éniqtur» dégenlerni qeyt qildi.

misir, ereb birleshme xelipiliki, girétsiye, qibris rim dairiliri we firansiye liwiyening sherqidiki qanunsiz qoralliq küchlerning lidéri xelife hafter qarmiqidiki qoralliq unsurlarning hujumlirida hayatidin ayrilghan puqralargha isharet qilmastinla, «liwiyediki tereplerni urush toxtitishqa chaqirghan» idi.