fahrettin altun: musapirlar kirizisi insaniyet üchün muhim mesile
jumhur reislik sariyi uchur-alaqe idarisi bashliqi fahrettin altun yer shari musapirlar kirizisining insaniyet üchün muhim mesile ikenlikini untumasliq kéreklikini éytti.
türkiye awazi radiyosi xewiri: jumhur reislik sariyi uchur-alaqe idarisi bashliqi fahrettin altun twittérda b d t musapirlar aliy komissarliqi teripidin shiwéytsariye paytexti jenwede échilghan we türkiye jumhur reisi rejep tayyip erdoghan teng riyasetchilik qilghan 1-qétimliq yer shari musapirlar munbiri toghrisida bayanat élan qildi.
u türkiyening musapirlargha munasiwetlik eng chong mesilidin birini hel qilish üchün xelqaraliq paaliyetlerge bashlamchiliq qilghanliqini bildürdi. u mundaq dédi:
«yer shari musapirlar kirizisining pütkül insaniyet üchün muhim mesile ikenlikini untumasliq kérek. türkiye 4 milyon musapirgha sahibxanliq qiliwatidu. süriye bilen iraqta yurt-makanliridin ayrilghan yüz minglarche kishige yardem qiliwatidu. peqet rayonidila emes, belki pütkül dunyada qiyin ehwalda qalghan kishilerge yardem qolini uzutuwatidu.»
u yer shari xaraktérlik insaniy kirizisining keng kölemlik xelqaraliq heriketni teqezza qilidighanliqini eskertti we mundaq dédi:
«biz mezkur mesilide hem yardem qiliwatimiz hemde bashlamchiliq qiliwatimiz. nahayiti epsuski, bezi yawropa döletliri musapirlarni insan süpitide emes, belki xewpsizlik tehditi süpitide körmekte. türkiye xelqi bolsa, del buning eksiche, milyonlarche süriyelikke we iraqliqqa, afghanistanliqqa we bashqa döletlerdin kelgen kishilerge ishikini échiwatidu. bashqilar mesuliyitini ada qilmisimu, biz üstimizge chüshken wezipimizni ada qilishni dawamlashturimiz. türkiye sekkiz yilda iqtisadining bir qismini bu meqsette ishletti. bu mesilide, xelqaraliq yardemning yétersiz qalghanliqi nomus qilarliq ehwal. xelqaraliq jemiyetler bir yerge jem bolup, dunyadiki barliq musapirlargha yardem qilish mesiliside türkiyening izidin méngishi kérek.»
