erdoghan: herbiy herikettin waz kechmeymiz

türkiye awazi radiyosi xewiri: erdoghan türkiye büyük millet mejlisi bashliqi mustafa shentopning sahibxaniliqida istanbuldiki dolmabahche sariyida  ötküzülgen 3 – nöwetlik «térrorizmgha qarshi  küresh we rayonluq döletler ara munasiwetlerni kücheytish» témiliq parlamént bashliqliri yighinida qilghan sözide, türkiyening uda 35 yildin buyan térrorizm wabasigha qarshi izchil  küresh qilip kéliwatqanliqini tekitlep mundaq dédi: «nöwette biz oxshimighan isimlar bilen paaliyet élip bériwatqan bolsimu, lékin himmisining nishani dölitimizning birlik we barawerlikige, huzuri hem parawanliqigha ziyan yetküzüsh bolghan térrorluq teshkilatlirining hujumigha duch kéliwatimiz. türkiye bilen yüzturane hésablishishqa jüret qilalmaywatqan küchler bu térrorluq teshkilatlirini qollap kelmekete. chégra rayonlirimizning sirtida terbiyelengen bu térrorchilar purset tapsila puqralirimizning huzurigha, dölitimizning pütünlükige tehdit séliwatqan qanliq heriketlerni élip barmaqta. shunga térrorchilarning derwazimiz aldigha kélishini kütüshning ornigha öz jayda bir terep qiliwétishini qararlashturduq. bu meqsette, chégra rayonlirimizning sirtida uwa yasiwalghan bu térrorluq teshkilatlirini öz uwisida ujuqturuwétish istiratégiyesini tüzüp chiqtuq. türkiye qoshna ellerning we bashqa döletlerning igilik hoquqi we zémin pütünlükige hemishe hörmet qilidu؛ emma buning aldinqi sherti bu eller teripidin dölitimizning hujumgha uchrimasliqi, düshmenlerche paaliyetlerning élip bérilmasliqidur. bizning bu kürishimiz kordlarni emes, eksiche térrorluq teshkilatlirini nishan qilidu. kordlar bizning qérindashlirimizdur. meyli p y d bolsun, meyli y p g bolsun, meyli daésh bolsun hemmisi térrorluq teshkilatidur. bu heqte qolimizda yéterlik derijide delil – ispatlar hem höjjetler bardur.»

térrorchilarning topqa tutushi netijiside bir yashliq süriyelik bir bowaqning ölüp ketkenlikini eskertken erdoghan, mundaq dep körsetti: «buningdin bashqa yene, térrorchilarning hujumlirida bizning xelqimizdinmu 10 gha yéqin kishi hayatidin ayrildi. buningdin ilgiri yüzlerche kishi öltürüldi. ehwal ene shundaq tursa, biz qachanghiche kütimiz? xelqimizning ölüp kétishini kütüp turalmaymiz. türkiye bolush süpitimiz bilen, 911 kilométirliq chégra liniyemizdiki, süriye hökümitimu qobul qilmaywatqan p y d, y p g ge qarshi tashlighan bu qedimizdin esla waz kechmeymiz. <bu  herikitingizni toxtiting> dep uyaq – buyaqtin bizge tehditler kéliwatidu. amérika qoshma ishtatliri pirézidénti donald trampqimu, bashqa rehberlergimu <eger siler bizning bu herikitimizni toxtitalisanglar toxtitinglar» déduq. emma ular bizni toxtitalighini yoq. jümlidin biz özimizning mesilisini özimiz hel qilimiz, shunga bu meqsette atlanghan sepirimizdin axirqi ghelibini qolgha keltürmigüche esla qaytmaymiz.»