fahrettin altun: «qashiqchi jinayitide dawamliq adalet telep qilimiz»

türkiye awazi radiyosi: jumhur reislik sariyining uchur-alaqe ishliri mesuli fahrettin altun b d t teripidin tekshürülüwatqan jemal qeshiqchi jinayiti toghrisida roytérs agéntliqigha bayanat berdi. u bayanatida:

«seudi erebistan dairiliri adaletke xizmet qilish arzulirining ispati süpitide, jemal qashiqchining qatillirini aldin pilanlanghan bir jinayetni emelge ashurghan türkiyege ötküzüp bérishi kérek. pütkül dunya bu musapini yéqindin közitip turmaqta. türkiye démokratiye we erkinlikke ishengen barliq döletlerge oxshash, adaletni we heqiqetni izdimekte» dédi.

u b d t sotsiz, kolléktip halda we öz xahishi boyiche höküm qilinghan ölümler mexsus doklatchisi agnés kallémardning ziyaritidin memnunluq hés qilghanliqlirini bildürüp, agnés kallémardni seudi erebistanliq zhurnalist jemal qashiqchining ölümini éniqlashta namayan qilghan qetiy iradisi sewebidin tebriklidi.

u türkiye qolgha chüshürgen ispatlarning, agnés kallémardning muxbirlargha bergen chüshendürüshlirige mas kélidighanliqidin bésharet berdi.

u türkiyening alahide tekshürüshke qolidin kélishiche yardem qilidighanliqini eskertip: «asasen éytqanda, mezkur weqege munasiwetlik heqiqetler nahayiti éniq we ochuq, jemal qashiqchi bir guruppa seudi erebistanliq xadimlar teripidin munasiwetlik döletning istanbuldiki konsulxanisida temtirimestin öltürülgen. qatillar jesetni chaqqanliq bilen parchilighan. jemal qashiqchi qiyapitide yasanghan biri uning kiymini kiyip konsulxana binasidin chiqqan. bu aldin pilanlanghan, yawayilarche weqe hem insaniyetke qarshi ötküzülgen jinayet hemde erkin dunyaning ghayisige we xelqaraliq tertipke qilinghan xiyanet hésablinidu. seudi erebistan dairiliri ötüp ketken töt ay boyiche türkiyening munasiwetlik organliri yaki xelqaraliq jemiyetler bilen ötküzgen uchrishishlirida ochuq pozitsiyede bolmidi» dédi.

u waqitning ötüshi bilen asassiz inkar qilishning ornini, köngülsiz étirap qilishlarning alghanliqi üstide toxtilip, sözini mundaq dawamlashturdi:

«biraq, jemal qashiqchining méyitining qeyerde ikenliki, jinayet kimning körsetmisi bilen qilinghanliqi we jesetni otturidin yoqatqan yerlik hemkarlashquchining bar-yoqluqi hazirche éniqlanmidi. oxshash shekilde seudi erebistanliq teptishning qatillarni eyibligen yaki eyiblimigenliki, bu toghrida sot échilip-échilmighanliqimu éniqsiz halette turmaqta. weqe musapisining pütünley ochuq-ashkara bolmighan shekilde bolushi, muhim endishelerni peyda qilmaqta we seudi erebistanning munasiwetlik dairilirining abruyigha ziyan bermekte.»

u axirida, jemal qashiqchi üchün adalet telep qilishni dawamlashturidighanliqini tekitlep mundaq dédi:

«jinayetchilerning jazagha tartilmasliqi, méyitning ailisi we yéqin-yoruqlirining dert-hesritini barghanséri ashurmaqta. seudi erebistan dairiliri adaletke xizmet qilish arzusining ispati süpitide qashiqchining qatillirini aldin pilanlanghan jinayet ötküzülgen türkiyege qayturup bérishi kérek. pütkül dunya bu musapini yéqindin közetmekte. türkiye démokratiye we erkinlikke ishengen barliq döletlerge oxshash, adaletni we heqiqetni izdimekte.»