chawushoghlu munbich mesiliside amérika bilen kélishkenliklirini bildürdi

türkiye awazi radiyosi xewiri: dölitimiz tashqi ishlar ministiri mewlüt chawushoghlu washingtonda amérika tashqi ishlar ministiri mayk pompéyo bilen körüshkendin kéyin, axbarat élan qilish yighini ötküzdi. u pompéyo bilen bolghan körüshüshide, munbich mesilisini asas qilghan halda süriye kirizisi we bashqa rayonluq mesililerning muzakire qilinghanliqini eskertti.

u amérika bilen deslepte bölgünchi térrorluq teshkilati p k k|p y d-y p g ning munbich rayonidin chiqirilishi üchün pilan tüzülidighanliqini bildürdi.

u: "pilanning ijra qilinishi üchün éniq kün békitildi. bu emeliyette bésilidighan qedemlerge baghliq, bu alte aydin az bolghan bir jeryandindur" dédi.

u p k k|p y d-y p g ning munbich rayonidin chiqirilishining amérika sabiq pirézidénti barak obamaning türkiyege bergen wedisi ikenlikini xatiriletken halda: "bu wedide turulmighan we bügüngiche bu toghrida qedem tashlanmighan idi. pilanning testiqlinishi, amérikaning bizge bergen wediside turghanliqi menisige ige. munbichte yerlik hakimiyetning qurulushida hemkarlishimiz" dédi.

amérika kongresidiki türkiyege "F-35" urush ayropilani sétip bérilishi heqqide qozghalghan talash-tartishlar üstide toxtaldi. u mundaq dédi:

"tehdit xaraktérlik gep-sözlerni qobul qilmaydighanliqimizni we buning mesilisini hel qilmaydighanliqini éyttuq. F-35 lerni tapshurush-tapshuruwélish murasimliri pilan boyiche 21-iyun ötküzülidu. buningda héchqandaq özgirish yoq."

u körüshüshte yene, fethullahchi térrorluq teshkilatining kattibéshini qayturup bérish mesilisiningmu küntertipke kelgenlikini bildürdi.

u amérika tashqi ishlar ministiri mayk pompéyoning fethullahchi térrorluq teshkilati toghrisida fédératsiye tekshürüsh idarisi (FBI) ning muhim tekshürüshlerni élip barghanliqini éytqanliqini qeyt qildi.