rusiye S-400 lerni pat yéqinda tapshuridighanliqini bildürdi
rusiye «S-400» bashqurulidighan bombilarni türkiyege 2020-yilighiche tapshurup bolushqa tirishiwatqanliqini bildürdi.
türkiye awazi radiyosi xewiri: rusiye pirézidénti wladimir putinning yardemchisi yuri ushakow S-400 hawa qalqan sistémilirining batariyelirini türkiyening telep qilghinidek pat yéqinda tapshurush üchün dawamliq qolidin kélishiche tirishchanliq körsitidighanliqlirini éytti.
ushakow türkiyege S-400 hawa qalqan sistémilirini pilandikidin burun tapshurushqa munasiwetlik soalgha jawab berdi. u: «melum bolghinidek, bu mesilini türkiye terep küntertipke qoydi. tashqi ishlar ministiri sérgéy lawrow buning jawabini berdi. bilishimche, türkiyening bu telipini orunlash üchün tirishchanliq körsitilidu» dédi.
rusiye tashqi ishlar ministiri sérgéy lawrow 14-mart moskwada türkiye tashqi ishlar ministiri mewlüt chawushoghlu bilen körüshkendin kéyin, enqerening telipige asasen «S-400» lerni tapshurush süritini tézleshtüridighanliqlirini bildürgen idi. türkiyening kélishim boyiche töt dane S-400 batariyeliri üchün rusiyege 2.5 milyard dollar töligenliki élan qilinghan idi.
dunyada ishlitiliwatqan eng yaxshi hawa qalqan sistémiliridin biri bolghan S-400, her xil ayropilan yaki uchquchisiz hawa apparatlirini, kruz we balistik bashqurulidighan bombilarni pachaqliyalaydu. eng yiraq bolghanda 400 kilométir, eng égiz bolghanda 30 kilométir musapigha yétip baralaydighan bu hawa qalqan sistémisi, kérek bolghanda her bir nishangha ikki bashqurulidighan bombini toghrilap, oxshash waqitta 80 nishangha zerbe béreleydu. S-400 tapshurulghanda, türkiye S-400 batariyesige ige tunji nato döliti bolup qalidu.
