erdoghan: türkiyening herqandaq bir qimmet qarishigha til uzartilishigha qetiy yol qoymaymiz

türkiye awazi radiyosi xewiri: jumhur reis we adalet we tereqqiyat partiyesi bashliqi rejep tayyip erdoghan partiyesining balikesir wilayetlik shöbisining ikkinchi nöwetlik kéngeytilgen meslihet mejlisi yighinida söz qildi. 8 – noyabirdin 17 – noyabirghiche bolghan ariliqta ötküzülgen norwégiyediki nato manéwirida atatürk bilen özining hujum nishani qilinghanliqigha we gollandiyede nato eskerliri teripidin özining namida ijtimaiy taratquda yalghan adrés échilip, natogha qarshi uchurlarni tarqitishigha naraziliq bildürgen erdoghan, milletning izzet – hörmitini qoghdash üchün namayan qilghan irade sayisida, bezi qatlamlarning özlirini ongshiwélishqa mejbur bolghanliqini éytti.

erdoghan, «ne manga, ne jumhuriyitimizning qurghuchisi ghazi mustapa kemalgha, ne armiyemizge, ne bu döletning bashqa herqandaq bir qimmet qarishigha til uzartilishigha qetiy yol qoymaymiz. bolupmu bu éziz milletning abruyi bilen oyun oynilishigha qetiy ruxset qilmaymiz» dégenlerni qeyt qildi.

22 – noyabirda rusiyening sochi shehiride chaqirilghan süriye mesilisige chare izdesh meqsetlik üch terep bashliqlar yighini toghrisida toxtalghan erdoghan, «türkiye, rusiye we iranning süriyediki insaniy tiragédiyege xatime bérish üchün nahayiti muhim qararlarni chiqarghanliqlirini, yéqinda bu qararlarning ijabiy tesirlirini emeliy meydanda téximu roshen körüshni bashlaydighanliqlirini éytti.

üch dölet rehberlirining buningdin kéyin pat – pat uchriship turidighanliqini eskertken erdoghan, «pütkül dunya sochidiki yighindin ümid, muqimliq, tinchliq we kélechek chiqidighanliqini kördi. süriyelik qérindashlirimiz sochidiki yighin sayisida yillar ötkendin kéyin wetenlirige qaytish éhtimalini kördi» dédi.