erdoghan maskni qobul qildi
jumhur reis rejep tayyip erdoghan, dunyawi shöhretke ige soda – sanaetchi, tokluq aptomobil bazirining bayraqdari tésla motor guruhining bashliqi élon maskni jumhur reislik sariyida qobul qildi.
türkiye awazi radiyosi xewiri: jumhur reislik sariyi bash katip yardemchisi we bayanatchisi ibrahim qalin, erdoghan bilen maskning uchrishishida türksat 5a we 5b süniy hemrahlirining alem boshluqigha qoyup bérilishi, tokluq aptomobil mesilisi, qayta hasil bolidighan énérgiye, tésla we speys éks (SpaceX) shirketliri bilen türkiyediki shirketler ortaqliship qilalaydighan ishlar toghrisida pikir almashturulghanliqini bildürdi.
ibrahim qalin, élon maskning türkiyege türksat 5a-5b süniy hemrahlirining alem boshluqigha qoyup bérilishi toghrisida sözlishish üchün kelgenlikini eskertip, «bügün bu dairide ayrbas bilen bir kélishim imzalinidu. umu buning töwen qanat teminligüchilirining biri. yene biri özining speys éks shirkiti. bu heqte sözleshtuq» dédi.
türksat 5a – 5b süniy hemrahlirining türkiyening özining milliy süniy hemrahini wujudqa chiqirish musapisige qedem bésishtiki nahayiti muhim bir basquchqa wekillik qilidighanliqini qeyt qilghan ibrahim qalin, «türksat 6 süniy hemrahinimu özimizning téxnologiyelik imkaniyitige tayanghan halda pütünley türkiyede yasap chiqilidu» dégenlerni qeyt qildi.
qalin, buning bilen birlikte jumhur reis erdoghanning aptomobil mesilisi we tésla toghrisidimu sözleshkenlikini bildürüp, «türkiyede sélinghan téxnologiyelik sélinmilar, yéqinqi mezgillerde tashlanghan qedemler toghrisidimu sözleshtuq. élon muskning shirkiti eslide nahayiti chong qayta hasil bolidighan énérgiye shirkiti. shunga yéngi ewlad bataréyeler , quyash énérgiyesi, shamal énérgiyesi dégendek mesililer heqqidimu sözleshtuq. chong sheherlerdiki qatnash mesililirini qandaq hel qilghili bolidu, tonél échish, qatnashning yer astigha élinishi qatarliq mesililernimu muhakime qilduq. yene tésla we speys éks shirketliri bilen türkiyediki shirketlerning birlikte qandaq ishlarni qilalaydighanliqi heqqidimu pikir almashturuldi» dédi.
mask uchrishishtin kéyin, türkiye jumhuriyitining qurghuchisi atatürkning qebrisi jaylashqan atatürk xatire sariyini ékskursiye qildi. ikki saet ichide énstigram adrésigha ikki parche resim chiqarghan musk, birinchi resimining astigha «atatürk, atatürk xatire sariyi» dep yazdi. resim 500 mingdin artuq ademning yaqturushigha érishti.
mask yene atatürk xatire sariyigha dair bir foto – süret ortaqliship, gülchembirek qoyghanliqini bildürdi we atatürk heqqide «üch sunuq qowurgha, bir töshük öpke we u yenila jeng qildi» dep yazdi.
