erdoghan yawropa ittipaqini tenqid qildi

türkiye awazi radiyosi xewiri: jumhur reis rejep tayyip erdoghan istanbulda islam hemkarliq teshkilati mupettishler birleshmisining 1-qétimliq omumiy kéngesh yighinida söz qildi. u türkiyening yawropa ittipaqigha eza bolush musapiside téz sürette we semimiy shekilde emelge ashurghan islahatlarning, toluq eza bolushqa yetmigenlikini, biraq démokratik ölchemlerni yuqiri sewiyege chiqarghanliqini eskertti.

u yawropa ittipaqi bilen türkiye otturisida xuddiy tiyatir oyunigha aylanghan mezkur küreshte, chapan salghan terepning türkiye bolmaydighanliqini hemme kishining bilishi kéreklikini؛ bu mesilide qarar béridighan terepning we bu heqtiki qararni pütkül dunyagha élan qilishi kérek bolghan terepning yawropa ittipaqi ikenlikini bildürdi. u mundaq dédi:

«qéni ular qararini bersun, biz qararimizni nahayiti asan bérimiz, biz ularning qararini dunyagha yetkidek sewr bilen saqlaymiz.»

u tünügün (24-séntebir) gérmaniyede ötküzülgen saylamning bir sawaq ikenlikini eskertip, mundaq dédi:

«chünki kishiler hemme nersini nahayiti éniq bilidu, biz nurghun ishlarni éyttuq. biraq, ular yüzini tetür öridi, mana emdi heqiqet otturigha chiqti, bizning démokratiye, erkinlik heq-hoquqlirigha munasiwetlik héchqandaq qiyinchiliqimiz yoq, héchqandaq döletning xelqi bilen mesilimiz yoq, bizning peqet u yerlerdiki hakimiyetler we hakimiyet bashqurush shekli bilen mesilimiz bar bolushi mumkin.»

u bashqa döletler namzat bolghanda tilgha élinmighan qaide-pirinsiplarning, türkiyege kelgende qobul qilmasliq üchün yéngidin ijad qilinghandek qaide-pirinsiplarning otturigha chiqirilghanliqini xatiriletti. u mundaq dédi:

«biz peqet yawropa ittipaqining öz mesuliyitini ada qilish mesilisige duch kelduq. yawropa ittipaqi muzakire témilirini bashlimay, erkin sayahet qilish hoquqimizgha dexli-terüz qilip, musapirlar mesilisidiki mesuliyitini ada qilmay we nurghun mesilide bergen wedisini ada qilmay ishenchilik derijisini yer bilen yeksan qildi.»