qurtulmush: istanbul hujumchisining barmaq izi we shekli éniqlandi
bash ministir yardemchisi we hökümet bayanatchisi numan qurtulmush, yéngi yil kéchisi istanbuldiki bir kéchilik kulubni qangha boyighan térrorchining barmaq izi we sheklining éniqlanghanliqini bildürdi.
türkiye awazi radiyosi xewiri: bu yilning tunji ichki kabinét yighini jumhur reis erdoghanning riyasetchilikide jumhur reislik sariyida ötküzüldi. yighinning küntertipini istanbuldiki térrorluq hujumi teshkil qildi.
yighin toghrisida bayanat bergen bash ministir yardemchisi we hökümet bayanatchisi numan qurtulmush, «türkiye bu xain hujumdin qorqup ketmeydu» dédi we türkiyening térrorluq teshkilatlirigha qarshi keng kölemlik kürishining dawamlishidighanliqini eskertti.
ottura sherqte tinchliq ornitish tirishchanliqlirining dawamlishidighanliqini eskertken qurtulmush, iraq bilen yéngi bir sehipining échilidighanliqini sözlirige ilawe qildi. u sözini dawamlashturup, «bolupmu firat qalqini herikiti dairiside utuqluq shundaqla qetiy irade bilen süriyede dawamlashturuluwatqan herbiy heriketlerning hem térrorluq teshkilatlirini hem térrorluq teshkilatlirini pichka qilip qolliniwatqanlarni biaram qilghanliqi otturigha chiqmaqta. bolupmu yéqinqi mezgillerdiki emeliy sahediki ghelibimizni hezm qilalmighan küchlerning térrorluq herikitini yéteklewatqanliqi namayan bolmaqta» dédi.
u yene, «qandaq pilan tüzsenglar tüzünglar, türkiye her qandaq tedbirni yolgha qoyushqa qadirdur. herbiy heriketler térrorluq teshkilatliri türkiyege qetiy tehdit salalmaydighan halet shekillengüche dawamlishidu. jerablus, munbich, elbab... qeyergiche ketse meyli. qetiy irade bilen chégra sirtidiki herbiy heriketlerni dawamlashturimiz» dégenlerni qeyt qildi.
