adanada yüz bergen térrorluq hujumida yarilanghanlarning sani 21 ge yetti
adana waliy mehkimisi etrapidiki bir aptomobil toxtitish meydanida etigen tereplerde yüz bergen térrorluq hujumida yarilanghanlarning sani 21 ge yetti.
türkiye awazi radiyosi xewiri: adana waliysi mehmud demirtash partlashta 2 kishining ölgenlikini, 16 kishining yarilanghanliqini jakarlighanidi. biraq kéyinche hujumda yarilanghanlarning 21 ge yetkenliki bildürüldi.
waliy hujumning mersin nomur taxtiliq aptomobilda bir ayal teripidin élip bérilghanliqini uqturdi.
emgek we ijtimaiy bixeterlik ishliri ministiri mehmet muezzinoghlu yarilanghanlardin 5 ining ehwalining éghir ikenlikini jakarlidi. partlashtin kéyin neq meydangha köp sanda qutquzush mashinisi ewetildi.
partlashning tesiride waliy mehkimisi binasi ziyangha uchridi.
weqedin kéyin aptomobil toxtitish meydanining bir muhapizetchisi qolgha élindi.
yawropa ittipaqi ishliri ministiri, qoshumche bash muzakirichi ömer chelik ammiwi ortaqlishish tor béti Twitter sehipiside élan qilghan bayanatida, weqening térrorluq hujumi ikenlikini tekitlep mundaq dédi: «leniti térror xelqimizni nishan qilishni dawamlashturmaqta. insanliq namidin adaqqiche térrorizmgha qarshi küresh qilimiz.»
muawin bash ministir numan qurtulmushmu ammiwi ortaqlishish tor béti sehipiside bu heqte élan qilghan bayanatida, mundaq dédi: «rayonda oyniliwatqan suyiqestlik oyunni tarmar qilghanliqi üchün nishangha ayilinip qalghan türkiye hergizmu térrorgha bash egmeydu, eksiche térrorizmgha qarshi kürishini adaqqiche dawamlashturidu. hem adanada yüz bergen xainlarche térrorluq hujumini hem térrorni hemde térrorizmning qollighuchilirini qattiq lenetleymen. hujumda hayatidin ayrilghanlargha allah taaladin rehmet, yarilanghanlargha shipaliq tileymen.»
