adanadiki partlashta 2 kishi öldi, 33 kishi yarilandi

türkiye awazi radiyosi xewiri: emgek we ijtimaiy bixeterlik ishliri ministiri mehmet muezzinoghlu yarilanghanlardin 5 ining ehwalining éghir ikenlikini jakarlidi.

weqedin kéyin aptomobil toxtitish meydanining bir muhapizetchisi qolgha élindi.

adana waliysi mehmud demirtash hujumning mersin nomur taxtiliq aptomobilda bir ayal teripidin élip bérilghan bolush éhtimalliqining yuqiri ikenlikini uqturdi.

adanadiki térrorluq hujumigha hökümetmu arqa - arqidin naraziliq bildürdi.

bash ministir yildirim hujum toghruluq munasiwetlik ministirlargha téléfon qilip, uchur igilidi.

yawropa ittipaqi ishliri ministiri, qoshumche bash muzakirichi ömer chelik ammiwi ortaqlishish tor béti Twitter sehipiside élan qilghan bayanatida, weqening térrorluq hujumi ikenlikini tekitlep mundaq dédi: «leniti térror xelqimizni nishan qilishni dawamlashturmaqta. insanliq namidin adaqqiche térrorizmgha qarshi küresh qilimiz.»

muawin bash ministir numan qurtulmushmu ammiwi ortaqlishish tor béti sehipiside bu heqte élan qilghan bayanatida, mundaq dédi: «rayonda oyniliwatqan suyiqestlik oyunni tarmar qilghanliqi üchün nishangha ayilinip qalghan türkiye hergizmu térrorgha bash egmeydu, eksiche térrorizmgha qarshi kürishini adaqqiche dawamlashturidu. hem adanada yüz bergen xainlarche térrorluq hujumini hem térrorni hemde térrorizmning qollighuchilirini qattiq lenetleymen. hujumda hayatidin ayrilghanlargha allah taaladin rehmet, yarilanghanlargha shipaliq tileymen.»

muawin bash ministir nurettin janiqli bu heqte élan qilghan bayanatida, «térror we yardemchilirige qarimay türkiyening birliki, küchi we qudret tépish iradisi qetiy bolup, dölitimizning igilmes – sunmas iradisini sundurushqa héchkimning küchi yetmeydu» dédi.

énérgiye we tebiiy  bayliqlar ministiri berat albayraqmu térrorluq hujumigha naraziliq bildürüp mundaq dédi: «térrorgha purset bolup qalmasliqi üchün adanada chaqirilghan énérgiye yighinimizni bikar qilmiduq. xelqimiz bu hujumni élip barghanlarghimu, ularning gumashtilirighimu tégishlik inkas qayturush küchige ige.»

amérika qoshma ishtatliri enqere bash elchixanisimu hujumni eyiblidi.

amérika bash elchixanisi teripidin bu heqte élan qilinghan bayanatta, mundaq déyildi: «adanadiki qorqunuchluq hujumni qattiq eyibleymiz. hayatidin ayrilghanlargha matem tutimiz, yarilanghanlargha shipaliq tileymiz. türkiyening térrorizmgha qarshi kürishini qollaydighanliqimizni pütkül jahangha jakarlaymiz.»