erdoghan: oqutquchilirini bicharilikke mehkum qilghan milletning menlik éngi rawajlanmaydu
jumhur reis rejep tayyip erdoghan, muellimlirini, muderrislirini tégishlik derijide hörmetlimigen, ularning pidakarliqigha ehde – wapa qilmighan bir döletning kélechikining qarangghu bolidighanliqini éytti.
türkiye awazi radiyosi xewiri: jumhur reis erdoghan, beshtepe millet qurultay we medeniyet merkizide ötküzülgen oqutquchilar bayrimi paaliyitide oqutquchilargha xitab qilip, «oqutquchilirini yoqluqqa, yoqsulluqqa, bicharilikke mehkum qilghan bir milletning menlik éngimu, medeniyet tesewwurimu rawajlanmaydu, güllenmeydu. bundaq bir döletning bir izda toxtap qélishi muqedderdur.» dédi.
oqutquchiliq kespining peqet oqu – oqutush musapiside hasil qilghan ilimni sinipta oqughuchilargha yetküzüshtin ibaret emeslikini eskertken erdoghan, «oqutquchiliq ilim bilen birge tejribe we érpan bilen perzentlirimizni, yashlirimizni kélechekke teyyarlash kespidur. bu nuqtidin qarighanda oqutquchilar maarip sistémimizning ul téshi, istiqbalimizning binakarliridur» dégenlerni qeyt qildi.
erdoghan sözini dawamlashturup, «biz yashawatqan tupraqlar medeniy we tarixiy jehettin bay bolushtin bashqa bir döletler qebristanliqidur. bu tupraqlarda dölet bolup rawajlinish bir terepte tursun, mewjutluqimizni muhapizet qilish üchünmu éghir bedellerni töleshke teyyar turushimiz kérek» dédi.
«anadoluning ishiklirini özimiz üchün menggülük achqan 1071 – yilidin buyan keskin küresh qilip kelduq, hélihem qilmaqtimiz» dégen erdoghan, «bu küresh yalghuz jeng meydanliridila qilinmidi؛ yalghuzla siyaset sehniside, diplomatiyede, sodida, sanaette körülmidi؛ asasliq küresh ilim hayatida, pende, maaripta boldi» dégenlerni sözlirige ilawe qildi.
