gérmaniye parlaménti atalmish ermeni dewalirini qobul qildi

türkiye awazi radiyosi xewiri: dölitimiz jumhur reisi rejep tayyip erdoghan atalmish 1915 – yil ermeni dewalirigha munasiwetlik qanun teklipining, gérmaniye fédératsiye mejlisi (parlaménti) de qobul qilinghanliqi üstide toxtaldi. atalmish ermeni dewaliri heqqidiki qanun layihesining gérmaniye fédératsiye mejliside qobul qilinishining, ikki dölet munasiwetlirige chong tesir körsitidighanliqini éytti.

kéniyede dölet ishliri ziyaritide boluwatqan jumhur reis rejep tayyip erdoghan, türkiyege qaytqandin kéyin bésilidighan qedemler üstide oylishidighanliqlirini eskertip, tashqi ishlar ministirliqining munasiwetlik mesulliri bilen mesilini tepsiliy muhakime qilidighanliqlirini bildürdi.

dölitimiz bash ministiri binali yildirim ermeni dewalirigha munasiwetlik qanun teklipi awazgha qoyulghandin kéyin, bérlindiki türkiye bash elchisini kéngishish üchün chaqirtqanliqini uqturdi. u türkiyening gérmaniye fédératsiye parlaméntidin ötken atalmish 1915 – yil weqelirige munasiwetlik ermeni dewaliri qanun teklipini hergizmu qobul qilmaydighanliqini tekitlidi. u: «bizning ötmüshimiz éniq, bu bir xata qarar» dédi.

muawin bash ministir numan qurtulmush gérmaniye fédératsiye parlaméntida qobul qilinghan qanun teklipining türkiye üchün héchnime emeslikini bildürdi. u: «burmilanghan we asassiz dewalarning qobul qilinishi tarixiy xataliqtur» dédi we buninggha xelqaraliq munberlerde tégishlik jawab béridighanliqlirini tekitlidi.

türkiye tashqi ishlar ministiri mewlüt chawushoghlu gérmaniye fédératsiye parlaméntining qararigha naraziliq bildürüp mundaq dédi: «özining qara betlirini bashqa döletlerning tarixini burmilash we  mesuliyetszlik qilish bilen aqlighili bolmaydu.»

adalet we tereqqiyat partiyesining bayanatchisi yasin aktay türkiye – gérmaniye munasiwetlirining, bu qanun teklipi bilen éghir ziyangha uchrighanliqini éytti. u: «gérmaniye parlaméntining qarari dostane emes, munasiwetlirimizge éghir ziyan saldi» dédi.

jumhuriyet xelq partiyesining parlamént ezasi barish yarkadash bu heqte toxtilip: «bu qarar héchnimige erzimeydu, parlaméntlar bu xil tarixiy weqelerge munasiwetlik qarar chiqirishtin waz kéchishi lazim» dédi.

türkiye büyük millet mejlisi (parlaménti) gérmaniye parlaméntining qararini eyiblep ortaq xitabname élan qilishqa teyyarlandi.

gérmaniye fédératsiye parlaménti ermenlerning 1915 – yil dewalirini «irqiy qirghinchiliq» dep étirap qilidighan qanun teklipini qobul qildi. qanun teklipini awazgha qoyushqa bash ministir mérkélning qatnashmasliqi alahide diqqet qozghidi. u qanun teklipi awazgha qoyulup, azghine waqit ötkendin kéyin élan qilghan bayanatida, «türkiye bilen keng dairelik we nahayiti küchlük munasiwetlirimiz bar» dégen sözlerge orun ajratti.  

bu peytlerde, gérmaniyening enqerediki bash elchisi tashqi ishlar ministirliqigha chaqirildi.