11.12.2023

türkiye awazi radiyosi: «hürriyet» géziti: jumhur reis rejep tayyip erdoghanning ariliqtin alte yil ötkendin kéyin ishqa ashurghan aténa (aféna) ziyaritining girétsiye taratqulirining küntertipidin orun élishni dawamlashturuwatqanliqini yazdi.

gézitning xewiride körsitilishiche, girétsiye taratquliri ikki dölet munasiwitidiki ijabiy keypiyatning dawamlishidighanliqi toghrisidiki mölcherlirini gewdilendürgen hemde girétsiye bash ministiri kiryakos michotakis bilen erdoghanning özara chaqchaqlirighimu keng orun bergen.

«star» géziti: türkiye bilen girétsiyening meblegh sélish ishxaniliri imzalighan kélishimlerning rohigha asasen, ikki dölet otturisidiki sélinma miqdarini ashurush üchün küch chiqirilidighanliqini, bu kélishim sayisida, ikki dölet otturisida biwasite xelqaraliq meblegh sélishning yéngi hemkarliq dewrining bashlanghanliqini otturigha qoydi.

xewerde, mezkur kélishimning özara meblegh sélishni ashurush we ikki dölet shirketlirining üchinchi döletlerde hemkarliq ornitishinimu öz ichige alidighanliqi qeyt qilindi.

«sabah» géziti: «térrorluq döliti israiliye»ning ayallar, balilar, yashanghanlar we bimarlar démestin qirghinchiliq qilghanliqini, dunyaning közi aldida qirghinchiliq qilghan israiliyege qarshi 10 dékabir kishilik hoquq bayrimida istanbulda pelestinni qollap namayish ötküzülgenlikini xewer qildi.

xewerde körsitilishiche, namayishni orunlashturghan ammiwi teshkilatlar «qatil israiliye» dégendek shoarlarni towlighan.

«yéngi shepeq» géziti: israiliyening ghezzede sadir qilghan urush jinayetlirini tizimgha élish meqsitide «insaniyet üchün tizimgha élish guruppisi» namliq bir xizmet guruppisining qurulghanliqini xewer qildi.  xewerde qeyt qilinishiche, dunyaning her qaysi jayliridiki senetkarlar, yazghuchi we zhurnalistlar öz saheliridiki eserliri arqiliq ghezzediki qirghinchiliqni otturigha qoyidiken. 30-dékabirghiche istanbuldiki rami kutupxanisida toplinidighan eserler tor bétidimu élan qilinidiken.

«xabertürk» géziti: asiya we yawropa qitesini tutashturup turuwatqan 1915 yil chanaqqele köwrükining dunyaning eng yaxshi qurulushliri bahalinidighan «qurulush xewerliri-xatirisi» zhurnilining bahalighuchilar ömikining «yilliq eng munewwer tür» mukapatigha layiq dep qaralghanliqi toghrisidiki uchurlarni oqurmenlirining diqqitige sundi.