07.12.2023
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
«sabah géziti», jumhur reis rejep tayyip erdoghanning israiliye istixbarat orgini mosadning türkiye qatarliq bir qisim döletlerde hamas rehberlirige suyiqest qilish teyyarliqi qiliwatqanliqigha dair xewerlerge naraziliq bildürüp: «eger ular türkiyede eshundaq bir qedem tashlashqa jüret qilidighan bolsa, buning bedilini bellirini qayta tüzliyelmeydighan derijide éghir öteydu» dégenlikini xewer qildi.
«star géziti», türkiye tashqi ishlar ministirliqining: «israiliye dairilirining bir tereptin ghezzediki puqralargha qaritilghan wehshiylerche hujumlirini dawamlashturup, yene bir tereptin ishghaliyet astidiki pelestin zéminida qanunsiz olturaq rayonlarni kéngeytishini qattiq eyibleymiz» dep bayanat élan qilghanliqini xewer qildi.
«höriyet géziti», dölet mudapie ministirliqining türkiyening közitish süniy hemrahliridin biri bolghan «göktürk -1» süniy hemrahining 7 yashqa kirgenlikige dair hembehirligen yazmisida: «göktürk -1 alem boshluqidiki wezipisi jeryanida, dunyani 37 ming 378 qétim aylinip, 82 ming 913 qétim süret tartti» dégenlikini xewer qildi.
«xeber türk géziti», amérikida qolgha chüshürülgen anadolugha tewe 41 parche tarixiy yadikarliqning axiri nyuyorktiki türkiye mesullirigha tapshurup bérilgenlikini, qayturulghan tarixiy yadikarliqlarning texminen 60 yil ilgiri burdurning bobon qedimki shehiridin amérikigha etkes qilinghanliqini hemde her xil muzéy we yighip saqlighuchilargha sétilghan bir qisim eserlernimu öz ichige alidighanliqini xewer qildi.
«yéngi shepeq géziti», dunya boyiche eng aldinqi qatardiki sayahet sheherliridin biri bolghan antalyada 2023 - yili noyabirning axirighiche 200 ge yéqin dölettin 15 milyon 371 ming sayahetchi kelgenlikini, 2023 -yili antalya sayahet tarixining eng köp sayahetchi rékorti yaratqan yili bolghanliqini xewer qildi.
