30.11.2023
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
«weten géziti», «erdoghan girétsiyege diyalog chaqiriqida boldi» serlewhilik xewiride töwendiki uchurlarni hembehirlidi:
jumhur reis rejep tayyip erdoghan döletler otturisidiki ixtilaplarning tebiiy ikenlikini tekitlep «eng muhimi bu ixtilaplarni chégish halgha keltürüshtin ilgiri hel qilish iradisidur» dédi hemde türkiyening bu iradisining barliqini tekitlep: «biz olturup söhbetleshkinimizde yenggili bolmaydighan mesile yoqliqigha ishinimiz. 7 – dikabirda élip bérishni pilanlighan girétsiye ziyaritimizge tutqan pozitsiyemizmu mushu yönilishte» dédi.
«xeber türk géziti», jumhur reis erdoghanning israiliyening qanun aldida jawabkarliqqa tartilidighanliqini tekitlep: «ghezzede mushu esrning eng chong wehshiylikni sadir qilghan israiliye bash ministiri bényamin nétanyahu ismini hazirdin bashlapla <ghezze qassapi> dep yazdurup boldi» dégenlikini xewer qildi.
«höriyet géziti», jumhur reis erdoghanning «nétanyahu ismini <ghezze qassapi> dep yazdurup boldi» dégen sözining dunyaning herqaysi jaylirida zor inkas qozghighanliqini we her qaysi xewer agéntliqlirining erdoghanning bayanatini abontlirigha «jiddiy kod» bilen yetküzgenlikini hemde nurghun gézitlerningmu erdoghanning mezkur sözige keng orun ajratqanliqini xewer qildi.
«star géziti», israiliye we uning hemkarlashquchilirining israiliye-hamas toqunushigha qarita birlikte élip barghan shunche tetür teshwiqatlirigha qarimay, gherbtiki we bashqa rayonlardiki milyonlighan kishilerning türkiye we qatar qatarliq bir qanche döletning axbarat wasitilirining yardimide, yüz bériwatqan ishlarning israiliyening dégenliridek emeslikini körgenlikini hemde naraziliqini bildürüsh üchün kochilargha chiqqanliqini, israiliyening bu nuqtidin tartip pikir burmilash urishida meghlup bolghanliqini xewer qildi.
«yéngi shepeq géziti», yawropa ittipaqining tashqi ishlar we bixeterlik siyasiti aliy wekili josép borrélning türkiyening barliq toqunushlarda dégüdek hel qilish mesiliside muhim rollarni oynap kéliwatqanliqini eskertip, ottura sherq tinchliq musapisi heqqide türkiye bilen alaqilishishqa teyyar ikenlikini bildürgenlikini xewer qildi.
