türkiye metbuatlirida bügün

türkiye awazi radiyosi xewiri: hörmetlik radiyo anglighuchi eziz qérindashlar! yéngi shepeq géziti, türkiyede ziyarette boluwatqan shimaliy atlantik ehdi teshkilati bash katipi andéris fog rasmussénning dölitimiz jumhur reisi abdullah gül teripidin qobul qilinghanliqini xewer qildi.
xewerde, rusmussénning wezipe ötesh mudditining küz peslide axirilishidighanliqi, bash katip bolup wezipe ötesh jeryanida körsetken xizmetliri üchün abdullah gülning rexmet éytqanliqi bildürüldi.
xewerde bash katip rasmussénning sintebir éyida ötküzülidighan nato aliy derijilik rehber yighinining küntertip maddiliri heqqide dölitimiz jumhur reisi abdullah gülge melumat bergenliki, uchrishishta iraq, ukraina, süriye we afghanistan weziyiti qatarliq rayon xaraktérlik yéngi mesililerning muzakire qilinghanliqi qeyt qilindi.
xewerde yene, türkiyening afghanistandiki xelqara tinchliq saqlash qisimliri dairiside élip bériwatqan paaliyetliri we ukraina weziytiningmu muzakire qilinghanliqi uqturuldi.
sitar géziti, «dunya boyiche eng chong port yasilish alidida» serlewhilik xewiride, dölitimiz bash ministiri rejep tayyip erdoghan teripidin dunya boyiche eng chong ayrodorum qurulushigha hul silinghandin kéyin, emdilikte yene bir chong layihening muzakire qilinghanliqi qeyt qilindi.
xewerde, ayrodorum qurulushi bilen birlikte 3 – köwrük we istanbul qanili qurulushi xizmetliridin kéyin, dunya boyiche eng chong port shehirining qurulidighanliqi bildürüldi.
axsham gézitining iqtisad sehipisidiki «türkiye hawa yolliri shirkiti 1 milyard 600 milyon dollarliq ayropilan zakas qildi» serlewhilik xewiride, türkiye hawa yolliri shirkitining amérika (Boeing) ayropilan shirkitige chong zakas bergenlikini yazdi.
xewerde, türkiye hawa yolliri shirkiti teripidin resmiy zakas qilinghan 15 dane (B737 MAX 8s) tipliq yoluchi ayropilanining normal tézimliktiki bahasining 1 milyard 600 milyon dollar ikenliki uqturuldi.
xewerde yene, türkiye hawa yolliri shirkitining aldinqi hepte élan qilghan bayanatida, zakas qilinghan ayropilanlarni 2020 – yili tapshurup aldighanliqini bildürgenliki, türkiye hawa yolliri shirkitining aldinqi yili 50 dane (737 MAXs) tipliq ayropilan we 20 dane (737s) tipliq ayropilan zakas qilghanliqi, bu qétimqi zakasning bolsa, aldinqi yilqi zakaslargha qoshumche ikenliki bildürüldi.
xeber türk géziti, «dunyaning 1000 – mirasi türkiyedin bolsun» serlewhilik xewiride, türkiyening b d t maarip, ilim – pen, medeniyet teshkilati (UNESCO) dunya mirasliri komitétige ezaliqqa saylanghanliqi we onlighan dölet teripidin iltimas sunulghan dunya mirasliri tizimliki muzakire üstilining yene bir teripide tünji qétim türkiyening olturghanliqi qeyt qilindi.
xewerde, dunya mirasi tézimlikige kirgüzülidighan 1000 – boyum belgilinidighan dunya mirasliri komitéti yighinining tünügün dohada bashlanghanliqi we 25 – iyunghiche dawamlishidighanliqi, türkiyedinmu bursa we jumaliqiziq bilen bergamaning tézimlikke kirgüzilishi üchün alaqidar höjjetlerning muzakirige sunulghanliqi bildürüldi.
radiyo anglighuchi eziz qérindashlar! yuqirida türkiye gézitliridin tallap teyyarlighan qisqiche xewerlirimizni anglidinglar!