08.06.2014

«‹hörriyet› géziti», «dunyaning eng chong ayrodurumining uli istanbulda sélindi» serlewhilik xewiride, jumhuriyet tarixining eng chong qurulushlirining biri bolidighan ayrodurum 76 yérim milyon kwadrat métirliq yerge sélinidighanliqini, alte musteqil qonush – qozghilish yoli, birla waqitta 500 ayropilan toxtash sighimchanliqigha ige béket supisi we 70 ming mashina sighimchanliqigha ige mashina toxtitish ornidin bashqa ayrodurumning eng muhim alahidilikining yilliq 150 milyon yoluchigha xizmet qilish iqtidarigha ige bolidighanliqi ikenlikini yazdi.
«‹milliyet› géziti», «iran bilen bolghan munasiwetler yéngiliqlargha qarap ilgirilmekte» serlewhilik xewiride, türkiye bilen iran arisida yéqinqi mezgillerde rawajliniwatqan munasiwetler dairiside bir yéngiliqning otturigha chiqidighanliqini yazdi. gézit, türkiye – iran aliy derijilik hemkarliq kéngishining birinchi qétimliq yighinining bash ministir rejep tayyip erdoghan bilen iran pirézidénti hesen ruhanining riyasetchilikide ötküzülidighanliqini, ruhanining yekshenbe küni türkiyege kélidighanliqini oqurmenliri bilen ortaqlashti.
«‹yéngi shepeq› géziti», «qazaqistan armiyesige ASELSAN yardimi» serlewhilik xewiride, türkiye herbiy sanaet idarisi ASELSAN ning qazaqistandiki shériki qazaqistan herbiy sanaet énérgiye shérkiti kéchisi köridighan apparatlarni ishlepchiqirish üchün qazaqistan mudapie ministirliqi we qazaqistan chégra mudapie qomandanliqi bilen ayrim – ayrim kélishim imzalighanliqini yazdi. gézit, qazaqistan herbiy sanaet énérgiye shirkitining buningdin ilgiri qazaqistan sanaet ministirliqidin kéchisi köridighan apparatlar we issiqliq énérgiye sistémilirining ishlepchiqirilishi we qazaqistanda sétilishi üchün ruxset alghanliqini qeyt qildi.
«‹xabertürk› géziti», «türk artis brodway sehniside» serlewhilik xewiride, yash artis esin waranning amérikida brodway sehnisige chiqip, dunyagha meshhur bir köp qisimliq téléwiziye tiyatirida rol alidighanliqini yazdi. gézit, türkiyede siyasiy penlerde oqughan bolsimu artis bolush istikining türtkiside amérikigha barghan esin waranning alahide iqtidari bilen brodwayda qisqa waqit ichide bashqilarning diqqitini jelp qilishqa muweppeq bolghanliqini qeyt qildi.
«‹sabah› géziti», qahramanmarashning uludaz égizlikidin ötüsh esnasida ajayip körkem körünüshlerni hasil qilghan «xanqiz» hasharetlirining milliy baghche xadimliri teripidin muhapizet astigha élinghanliqini yazdi. gézit, foto – süretchiler teripidin uludaz égizlikide tasadipiyla bayqalghan texminen 50 milyon etrapidiki «xanqiz» hasharitining ziyangha uchrimasliqini, shundaqla ularning sayahetchilikke hesse qoshushini közde tutqan tebietni muhapizet qilish we milliy baghchilar rayonluq idarisining mezkur hasharetlerni muhapizet astigha alghanliqini oqurmenliri bilen ortaqlashti.
hörmetlik radiyo anglighuchilar! yuqirida bügünki türkiye gézitliride orun alghan bezi muhim xewerlerning qisqiche mezmunliridin waqip boldunglar.