бакуда «қанлиқ йанвар» қирғинчилиқи хатириләнди

түркийә авази радийоси хәвири: әзәрбәйҗан хәлқи 1990-йили йүз бәргән қәтлиамда җенидин айрилғанларни хатириләш үчүн бакудики шеһитләр қәбристанлиқи (шеһитләр хийабани)ға қарап сәл болуп ақти. баку вә башқа шәһәрләрдин кәлгәнләр шеһитзарлиқ алдида узун өчрәтләрни һасил қилди. иштиракчи амма қәбриләргә гүлләрни қойуп, дуаларни қилди.

пирезидент илһам әлийев билән рәпиқиси меһрибан алийеваму шеһитләр қәбристанлиқини зийарәт қилип, әбәдий атәш хатирә мунариға гүлчәмбирәк қойди. әзәрбәйҗан хәлқи шу йәр вақти саәт 12:00 дә барлиқ шеһитләр үчүн бир минут сүкүттә туруп һөрмитини ипадилиди. бу җәрйанда, һазар деңизи саһилидики парахотлар, метро-пойизлар вә аптобуслар дүдүк чалди.

түркийәниң бакуда турушлуқ баш әлчиси җаһит бағҗиму шеһитләр қәбристанлиқини зийарәт қилип, шеһит қәбрилиригә гүлчәмбирә қойуп, дуа қилди. қанлиқ йанвар мунасивити билән түркийәниң бакудики әлчиханисидики түркийә байриқи йерим чүшүрүлди.

1990-йилиниң башлирида, әрмәнләрниң ешип барған земин тәләплиригә вә сабиқ советләр иттипақиға наразилиқ билдүргән әзәрбәйҗан хәлқи, бакуниң азадлиқ мәйданида топлинип, узунғичә йиғилиш өткүзди. 20-йанвар йиғилишни тарқитиветиш үчүн бакуниң охшимиған җайлириға киргән совет қизил армийәси, айаллар вә кичик балиларни өз ичигә алған 150 кә йеқин пуқрани қирғин қилди, йүзләрчә кишини йаридар қилди.

шеһитләр йүз миңларчә кишиниң қатнишиши астида, көз-йашлар ичидә гүл-чечәкләр билән бүгүнки күндә «шеһитләр һийабани» дәп атилидиған қәбристанлиққа йәрликкә қойулди.

әзәрбәйҗан хәлқи 34 йилдин буйан һәр йили 20-йанварда, қоллирида 20-йанвар қурбанлириниң символиға айланған қизил гүлләрни көтүргиничә шеһитзарлиққа келип, мурасим өткүзүп кәлмәктә.