japparow türkiye tashqi ishlar ministiri fidan bilen körüshti

türkiye awazi radiyosi xewiri: qirghizistan pirézidéntliq mehkimisi axbarat merkizi türkiye tashqi ishlar ministiri xaqan fidanning pirézidént sadir japparow teripidin huzurida qobul qilinghanliqi toghrisida bayanat élan qildi.

bayanatta bildürülishiche, japparow xaqan fidan bilen körüshkende, ikki dölet küntertipidiki bir qatar mesililerdin bashqa, sehiye, énérgiye we pul-muamile sahesi bilen rayon bixeterliki toghrisida özara pikir almashturghan.

jumhur reis rejep tayyip erdoghanning qirghizistan ziyariti we bishkekte ötküzülidighan yuqiri derijilik istratégiyelik hemkarliq kéngishi yighinining küntertip maddiliri muzakire qilinghan.

qirghizistan pirézidénti sadir japparow ikki dölet otturisidiki hemkarliqlirining keng saheler boyiche tereqqiy qiliishining ijabiy dinamiklirini qizghin qarshi alidighanliqini bildürgen.

sadir japparow iqtisadiy hemkarliq üstide toxtilip: «qirghizistan-türkiye hökümetler ara komitétining paytext enqerede ötküzülidighan yighinining, iqtisadiy küntertipni qollash nuqtisidin muhim ehmiyetke ige» dégen.

türkiye tashqi ishlar ministiri xaqan fidan özige körsitilgen méhmandostluq sewebidin pirézidént japparowgha teshekkür éytip: «ikki dölet rehberlirining ortaq tirishchanliqi sayisida özara hemkarliqlar kéngeytilip, muhim netijiler qolgha keltürüldi» dégen.

xaqan fidan béshkekte parlamént bashliqi nurlanbék shakiyéw bilenmu körüshken bolup, bu heqte élan qilinghan bayanatta qeyt qilinishiche, shakiyéw-fidan körüshüshide, siyasiy, iqtisadiy we medeniyet munasiwetlirini kücheytish bilen, parlaméntlar ara hemkarliqlarni tereqqiy qildurush mesilisi muzakire qilinghan.