губа шәһири «түрк дөләтлири тәшкилати йеза игилик пайтәхти» дәп елан қилинди

түркийә авази радийоси хәвири: әзәрбәйҗан йеза игилик министири мәҗнун мәммәдовниң саһибханлиқида чақирилған йиғинға түрк дөләтлири тәшкилати баш катипи, баш әлчи қубаничбек өмүралийев, түркийә деһқанчилиқ вә орманчилиқ ишлири министири ибраһим йумақли, өзбекистан йеза игилик министири әзиз воитов, шималий қибрис түрк җумһурийити йеза игилик вә тәбиий байлиқлар министири һүсәйин чавуш шундақла қирғизистан йеза игилик министирлиқиниң биринчи муавин министири мурат раматов вә қазақистан йеза игилик министирлиқиниң муавин министири абилхабир тамабек қатарлиқлар қатнашти.

министирлар йиғиндин кейин хитабнамә вә ахбаратқа байанат бәрди.

әзәрбәйҗан йеза игилик министири мәммәдов: «әзәрбәйҗан тәрәп болуш сүпитимиз билән, биз әза дөләтләргә түрк дөләтлириниң йәккә рәқәмлик йеза игилик санлиқ мәлумат суписи қуруш, TDT маркиси астида йеза игилик вә йемәклик мәһсулатлирини ортақ ишләпчиқириш қатарлиқ пикир вә тәклиплиримизни сундуқ вә бу йөнилиштә тәтқиқат елип бериш тоғрисида келиштуқ.

биз йәнә түрк дөләтлири тәшкилатиға әза дөләтләрдә йеза игилик пайтәхти елан қилиш түзүмини йолға қойушни тәвсийә қилдуқ. нөвәт билән, һәр йили бир шәһәр түрк дөләтлири тәшкилати йеза игилик пайтәхти дәп елан қилиниду. бу йиғинда биз әзәрбәйҗанниң губа шәһирини түрк дөләтлири тәшкилати йеза игилик пайтәхти дәп җакарлидуқ» деди.

министир йумақли мухбирларни күтүвелиш йиғинида байанат берип, йиғинда имканийәтлик сиҗил йеза игилики, өз - өзигә тайиниш вә йемәклик бихәтәрликигә капаләтлик қилишни мәқсәт қилған мәсилиләрниң музакирә қилинғанлиқини билдүрди.