байрамов: әрменийәгә узун муддәтлик тинчлиқ орнитиш тәклипимизни сунуватимиз

түркийә авази радийоси хәвири: бирләшкән дөләтләр тәшкилати (б д т) хәвпсизлик кеңиши даимий әза фирансийәниң тәлипигә бинаән, қарабағдики өзгиришләрни музакирә қилинди.

әзәрбәйҗан ташқи ишлар министири байрамов әзәрбәйҗанниң өз земинилиридики террорлуққа қарши туруш һәрикитини хәлқара қанун вә инсанпәрвәрлик һәқ – һоқуқлириға толуқ әмәл қилған һалда елип барғанлиқини йәнә бир қетим оттуриға қойди.

террорчиларға зәрбә бериш һәрикитиниң ахирлашқанлиқини вә қарабағдики әрмәнләрниң бир гәвдилишиш мусаписиниң башланғанлиқини тилға алған байрамов, әзәрбәйҗан әмәлдарлири билән қарабағдики әрмән аһалиси вәкиллириниң йевлаһта көрүшкәнликини билдүрди.

у террорлуққа қарши туруш һәрикитиниң «чәклик даирә вә мувазинәтлик һаләттә» елип берилғанлиқини шундақла униң пәқәт әзәрбәйҗан земинидики қанунсиз қораллиқ күчләрнила зәрбә обйекти қилинғанлиқини тәкитлиди.

әзәрбәйҗанниң қанунлуқ мәнпәәтләргә өзара һөрмәт қилиш асасида һәқиқий мәнидә сөһбәт вә музакиригә тәййар икәнликини тәкитлигән байрамов: «биз әрменийәгә йәнә бир қетим адил вә узақ муддәтлик тинчлиқ тәклипимизни сунуватимиз» деди.

у сөзини давамлаштуруп: «қарабағ әрмәнлири бизниң тинч биллә йашаш әндизимизниң бир қисми» дегәнләрни қәйт қилди.

түркийә муавин ташқи ишлар министири, баш әлчи бурақ ақчапар, түркийәниң әзәрбәйҗан әмәлдарлири билән  қарабағдики әрмән аһалиси вәкиллири оттурисида елип берилған сөһбәтни қизғин қарши алидиғанлиқини вә сөһбәтниң үнүмлүк давамлишишини үмид қилидиғанлиқини билдүрүп: «биз әрменийәниң зәнгәзор каридориниң ечилишини өз ичигә алған вәдилирини әмәлгә ашурушини үмид қилимиз» деди.

әрменийә вә башқа алақидар тәрәпләрни пурсәтни қолдин бәрмәсликкә чақирған ақчапар, түркийәниң икки дөләт оттурисидики тинчлиқ мусаписини баштин- ахир қоллап кәлгәнликини, шу вәҗидин әрменийә билән болған мунасивәтләрни нормаллаштуруш мусаписини башлиғанлиқини ейтти.

б д т сийасий ишлар бөлүминиң йавропа, оттура асийа вә америкаға мәсул муавин баш катипи мирослав җенка, б д т ниң мәйданда әмәсликини әскәртип өтти.

б д т баш катипи антонийо гутерресниң җиддийликтин қаттиқ әндишә қиливатқанлиқини билдүргән җенка, б д т мотидилликни сақлап қелишқа чақиридиғанлиқини тәкитлиди.

у һәрикәтниң ахирлашқанлиқи тоғрисидики уқтуруштин вақип икәнликлирини тилға елип, б д т ниң барлиқ күчләр билән қойуқ алақини давамлаштуруватқанлиқини вә тинчлиқ орнитиш тиришчанлиқини қоллашқа тәййар икәнликини сөзлиригә илавә қилди.